'Rusiya hərbçilərinin qalması səbəbindən sərhəddə daim toqquşmalar ola bilər'

Moskva və Bakı Rusiya sülhməramlı kontingentinin məsələsi ilə bağlı danışıqların növbəti raundunun tarixlərini razılaşdırırlar. Bunu Rusiyanın Azərbaycandakı səfiri Mixail Yevdokimov deyib. Onun sözlərinə görə, sülhməramlıların Qarabağda olması çox vacibdir.

Bu il yanvarın sonunda da Rusiyanın xarici işlər naziri Sergey Lavrov demişdi ki, "Moskva və Bakı hazırkı mərhələdə Rusiya sülhməramlılarının Dağlıq Qarabağda olmasının pozitiv rol oynadığı ilə razıdırlar".

Onun sözlərinə görə, iki ölkə prezidentləri bu mövzunu müzakirə ediblər: "Prezidentlərin mövqeləri o məsələdə üst-üstə düşür. İndiki mərhələdə Rusiya sülhməramlılarının orada olması regionda sabitliyin, etimadın qorunmasında və Qarabağa qayıtmaq istəyən sakinlərin dönüşünə kömək edilməsində pozitiv rol oynayır".

Rusiya sülhməramlılarının Qarabağda qalmaq müddəti 2025-ci ildə başa çatır. Onun müddəti yalnız tərəflərin razılığı ilə uzadıla bilər.

Milli Məclisin üzvü Aqil Abbas "Turan"a deyib ki, artıq bölgədə erməni əhalisi yoxdur ki, onların təhlükəsizliyini təmin etsinlər: "Ona görə də, yəqin ki, müqavilənin (9 noyabr 2020-ci ildə imzalanmış üçtərəfli bəyanat) müddəti başa çatandan sonra çıxıb gedəcəklər".

Bununla belə, deputatın fikrincə, hər şey Azərbaycan və Rusiya hökumətləri arasında danışıqlardan asılıdır: "Sülhməramlılar çıxarılacaqsa, müəyyən təxribatlar törətmək istəyərlər. Amma digər tərəfdən, buna da inanmıram, çünki Azərbaycan öz mövqeyini hər yerdə bildirib. Rusiya ilə müttəfiqlik bəyannaməmiz də var. Belə olan halda niyə bizimlə düşmənçilik etsinlər?".

Siyasi şərhçi Ərəstun Oruclu isə AzadlıqRadiosuna bildirib ki, Moskva ilə Bakı arasında müzakirələrin təşəbbüskarı Rusiyadır: "Rusiya "sülhməramlılar" adı altında hərbi kontingentinin Qarabağda qalmasında maraqlıdır və işini çox məharətli qurub. Moskva Rusiyanın Azərbaycanla yaxınlaşması nəticəsində Azərbaycanın faktiki olaraq dünyada təklənməsindən istifadə edir. Belə olan halda Rusiya hərbçilərinin Qarabağda qalacağı istisna deyil".

Ekspert Azərbaycanın Rusiyadan ehtiyatlandığını vurğulayır: "Məhz o ehtiyatlığın nəticəsidir ki, Azərbaycan Rusiya ilə dərin əməkdaşlığa getdi və, demək olar ki, bütün alternativ xarici siyasət imkanlarını məhdudlaşdırdı. Yaranmış vəziyyətdə Rusiyanın təzyiqi getdikcə artacaq. Azərbaycan da çalışır ki, daxili siyasi sabitliyini qorumaq üçün qısa zamanda, sülhməramlıların çıxarılma müddəti çatana kimi seçkiləri keçirsin".

Onun fikrincə, Bakı Rusiya sülhməramlılarının getməsini tələb edərsə, Rusiya ölkənin daxili siyasi vəziyyətini gərginləşdirməkdən tutmuş, Azərbaycan-Ermənistan sərhədində münaqişə yaratmağa qədər addımlar ata bilər: "Bunun üçün Rusiyanın yetərincə resursları var. Rusiya hərbçilərinin Azərbaycanda qalması səbəbindən Azərbaycan-Ermənistan sərhədində daim toqquşmalar ola bilər. Bu vəziyyəti də faktiki olaraq Rusiya yaradıb".