Sevinc Sadıqova: “Mən nə üçün hansısa dövlət oqranı barədə yalan məlumat yaymalıyam?”

Bakı/31.03.21/Turan: Hazırda həbsdə olan “Azel TV”nin baş redaktoru Əfqan Sadıqovun həyat yoldaşı Sevinc Sadıqova Baş Prokurorluğun 2021-ci il martın 30-da yaydığı məlumata münasibət ifadə edib.

“Məlumatı oxudum, punu pis dəyərləndirirəm. Mən buna qədər ailə həyatmıza olan şantajla bağlı Feysbukda paylaşmışam. Bu haqda Baş Prokurorluğa, Daxili İşlər Nazirliyinə müraciət edərək həyatımın təhlükədə olduğunu bildirmişdim. Amma müraciətimə Baş Prokurorluq, Daxili İşlər Nazirliyi olaraq reaksiya vermədilər”, deyə S.Sadıqova bildirir.

Onun sözlərinə görə, Feysbukda bəzi məqamları açdıqdan sonra 2021-ci il martın 10-da Dövlət Təhlükəsizlik Xidmətinə (DTX) çağırıldığını, saat 15-dən 19-a kimi orada saxlanıldığını və təhdidlərə məruz qaldığını iddia edir.

“Əgər bu təhdidlərdən sonra sussaydım, yaxşı vətəndaş olacaqdım. Amma övladlarımla təhdid edildiyimə görə susmadım. İndi isə Baş Prokurorluq mənə xəbərdarlıq edir ki, yalan məlumatlar yayıram. Mən nə üçün hansısa dövlət oqranı barədə yalan məlumat yaymalıyam? Mənim bunda nə marağım ola bilər? Heç bir yalan informasiya yaymamışam. Bizi də cəmiyyət tanıyır ki, yalan informasiyanı heç zaman yaymaram. Mən məcburiyyət qarşısında qalaraq, uşaqlarımla təhdid edildiyim üçün susmadım”, deyə o bildirir.  

S.Sadıqova şər atılaraq həbs oluna bilməsi ehtimalından danışır və bu barədə Feysbuk səhifəsində yazdığını diqqətə çatdırır: “Məni şər ataraq tuta bilərsiniz, buna da hazıram. Amma bu, məni susdurmayacaq. Çünki artıq ailəmi itirirəmsə, uşaqlarımla təhdid edilirəmsə, qorxacaq, itirəcək heç nəyim qalmır. Hər bir insan, qadın üçün ən dəyərlisi onun ailəsidir”, deyə S.Sadıqova bildirir.

Azərbaycan Baş Prokurorluğu martın 30-da məlumat yayaraq, Sevinc Sadıqovaya Dövlət Təhlükəsizlik orqanları və digər dövlət strukturları barədə “yalan ictimai rəy formalaşdıran” məlumatlar yaydığına görə xəbərdarlıq edib.

* Əfqan Sadıqov 2020-ci ildə xeberfakt.az  saytının redaktoru Sakit Muradov ilə birlikdə 10 min manat rüşvət almaqda ittiham olunaraq həbs edilib. Lakin bu faktla bağlı yalnız Əfqan Sadıqov mühakimə olunub. O, 7 il müddətinə azadlıqdan məhrum edilib.

Əfqan Sadıqov noyabrın 3-də aclıq aksiyasına başlayıb. Bir müddət sonra həkimlər ona süni qidalanma tətbiq ediblər. -05B-