![Şeyx Sərdarın həbsinə ruhani və ağsaqqallardan etiraz](https://turan.az/resized/750/500/resize/media/2017/main/040300187096.jpg)
Şeyx Sərdarın həbsinə ruhani və ağsaqqallardan etiraz
Bakıda Azərbaycan Ruhanilər Məclisinin (ARM) üzvi, “Maide.az” saytının baş redaktoru Şeyx Sərdar Hacıhəsənlinin hüquqlarının müdafiəsi ilə bağlı konfrans keçirilib. Bu haqda Turan-a Nardaran ağsaqqallarından Hacıağa Nuri bildirib.
Onun sözlərinə görə, tədbirin keçirilməsində əsas məqsəd Şeyx Sərdar Hacıhəsənlinin həbsinə etiraz və bu həbsin yerli və beynəlxalq hüquqa ziddi olduğunu bəyan etmək olub.
Konfransda çıxış edən din xadimləri və ağsaqqallar Şeyx Sərdar Hacıhəsənlinin şəxsiyyəti haqqında yüksək fikirlər səsləndiriblər: “Onun həbsi xalqın mənəviyyatına və dini dəyərlərinə qarşı yönəlmiş addımdır”, - deyə tədbir iştirakçıları bu həbsə münasibət ifadə ediblər.
İstər çıxış edən ruhanilər, istərsə də ağsaqqallar bu həbsi əsassız sayıblar, ölkədən kənarda dini təhsil alaraq qayıdıb onu ölkəsində təbliğ etməyə yasaq qoyulmasını islama, dinə qarşı addım sayıblar: “Müsəlman ölkəsi kimi, hər bir sahədə, o cümlədən, iqtisadiyyat, siyasət və digər elmlər üzrə insanlar ölkə hüdudlarından kənarda təhsil alır və geri döndükdən sonra ölkədə öz fəaliyyətlərini göstərirlər. Burada İslam dininin xüsusi vurğulanması kənardan açıq-aşkar görünür ki, hədəf alınan obyekt İslam dinidir”. Bunu isə Azərbaycan Ruhanilər Birliyinin (ARB) üzvü, ruhani Cəlal Şəfiyev bildirib.
Nardaran ağsaqqallarından Hacıağa Nuri isə Şeyx Sərdar Hacıhəsənlini vətənpərvər, dövlət və dövlətçiliyə dəyər verən insan kimi dəyərləndirib: “Hacı Sərdar heç vaxt nə dövlət, nə də dövlətçilik əleyhinə heç bir addım atmayıb. O, danışığını, oturuşunu, duruşunu bilən biridir. Onun namaz qılmağa görə ittiham olunaraq həbsi gülməlidir”.
Dini Etiqad və Vicdan Azadlığını Müdafiə Mərkəzinin rəhbəri, ruhani İlqar İbrahimoğlu hesab edir ki, burada məsələ təkcə S.Hacıhəsənlinin həbsi deyil, uzağa gedən mətləblər var: “Həm də yeni bir presedentin yaranmasına, yeni bir nümunənin ortalığa qoyulmasına şərait yaranır. Deməli, əgər bu (hüquqi) presedent yaranacaqsa, növbəti həftələrdə, növbəti aylarda Azərbaycanın hər yerində kütləvi halda bir çox ruhanilərin həbsi gözləniləndir. Əslində, bu proses əgər praktiki baş verəcəksə, ardı ümumiyyətlə, yeni bir mərhələnin kütləvi başlanmasıdır”.
İ.İbrahimolu hesab edir ki, bu toplantı çox simvolikdir, ruhaniyyət və ağsaqqallar bir yerdə Azərbaycanın bugünki durumunda baş verənləri həm İslam, həm də dövlət üçün çox təhlükəli görür və bu, heç də xoşa gələn məsələ deyil.
Çıxış edən ruhani alimlər və ağsaqqallar Şeyx Sərdarın həbsi və onun ittiham edildiyi maddəyə etirazlarını bildirərək, baş verən belə halların aradan qaldırılmasının vacibliyini söyləyiblər. -0-
-
- İqtisadiyyat
- 3 Aprel 2017 17:06
-
- İqtisadiyyat
- 3 Aprel 2017 18:44
Cəmiyyət
-
Ədalət Naminə Həmrəylik Komitəsinin təşəbbüsü ilə təşkil edilən, Azərbaycanda insan hüquqları vəziyyətinə həsr olunmuş vətəndaş cəmiyyəti fəallarının onlayn görüşündə jurnalistlərin, siyasi fəalların və müharibəyə qarşı çıxanların həbsi ilə bağlı ciddi narahatlıqlar vurğulandı. Avqustun 30-da keçirilən bu toplantı Beynəlxalq İtkin Düşənlərin Anım Günü ilə üst-üstə düşdü və Qarabağ müharibələrindən sonra həm Azərbaycan, həm də Ermənistan cəmiyyətlərinin qarşılaşdığı davamlı çətinlikləri diqqətə çatdırdı.
-
Sentyabrın 1-də Bakıda və Abşeron yarımadasında hava yağıntısız olacaq. Şimal-qərb küləyi gündüz cənub-şərq küləyi ilə əvəz olunacaq. Havanın temperaturu gecə müsbət 21+26, gündüz müsbət 33+38 dərəcə olacaq, Milli Hidrometeorologiya Xidməti bildirib.
-
Ölkənin aparıcı mobil operatoru "Milli və müasir" rəqəmsal muzeyini təqdim edir Azercell milli dəyərlərimizi müasir texnologiyalar vasitəsilə yaşatmaq, onları geniş auditoriyaya tanıtmaq və gələcək nəsillərə çatdırmaq məqsədilə "Milli və müasir" rəqəmsal muzeyi layihəsini təqdim edir. Bu innovativ təşəbbüs sənət və texnologiyanı birləşdirərək şirkətin hər iki sahəyə olan dəstəyini bir daha vurğulayır.
-
Bakının Suraxanı rayonu ərazisində sənaye zonasında bir obyektdə yanğın başlayıb. Yanğının söndürülməsinə FHN-in Dövlət Yanğından Mühafizə Xidmətinin qüvvələri cəlb olunub.
Rəy yaz