Şirinbacı Rzayevanın oğlunun məhkəməsində

Turqay Hüseynovun sədrliyi ilə 234.1-ci maddə ilə (qanunsuz narkotik maddə əldə etmə və saxlama) ittiham olunan İlqar Rzayevin işi üzrə bugünki prosesdə şahid ifadələri yekunlaşıb.

Şahid polis Atəm Abdullayev İlqar Rzayevin evində axtarış zamanı içində narkotik maddə olan bükülü tapıldığını bildirib.

Şahid qismində dindirilən İlqar Rzayevin anası Şirinbacı Rzayeva isə evdə aparılan axtarış zamanı onlara psixoloji təsir göstərildiyini, əməliyyatçıların özlərini təqdim etmədiyini bildirib. Rzayeva həmçinin evinə gələnləri əvvəlcə Bakı Şəhər İcra Hakimiyyətinin nümayəndələri hesab etdiyini və onların mülkiyyət məsələləri ilə bağlı gəldiyini zənn etdiyini deyib. 

Narkotik maddənin əməliyyatçılar tərəfindən evinə qoyulduğunu vurğulayan Şirinbacı Rzayeva oğlunun həbsinin mülkiyyət hüquqlarının pozulması zamanı etiraz aksiyalarında iştirakı və 22 aprel mitinqində hakimiyyət əleyhinə çıxış etməsinin nəticəsi olduğunu əlavə edib.

Vəkil Əsabəli Mustafayev isə  Rzayev həbs edilən zaman tərtib edilən protokolların sübut kimi yolverilməz olduğunu bildirib və onların cinayət işindən çıxarılması ilə bağlı vəsatət verib. 

Hakim yekun qərar qəbul edilərkən vəsatətdə göstərilənlərin nəzərə alınacağını bildirib və məhkəmə çıxışlarına keçmək üçün prosesi 31 avqust saat 14:30-a təxirə salıb. 

Xatırladaq ki, Cinayət Məcəlləsinin 234.1-ci (satış məqsədi olmadan qanunsuz olaraq narkotik maddələri və psixotrop maddələri şəxsi istehlak miqdarından artıq miqdarda əldə etmə və ya saxlama) maddəsi ilə təqsirləndirilən İlqar Rzayev bu il mayın 11-də həbs edilib. İttiham təsdiqlənərsə o, 3 il müddətinə azadlıqdan məhrum edilə bilər. -05D-