Siyasi Məhbusların Monitorinqi Mərkəzi «Nardaran işi» üzrə hökmü pisləyir

Siyasi Məhbusların Monitorinqi Mərkəzi “Nardaran işi” üzrə ittiham olunan “Müsəlman  Birliyi” Hərəkatı üzvlərinin və AXCP sədrinin müavini Fuad Qəhrəmanlının barəsində hökmü qəti şəkildə pisləyib.

Təşkilatın bəyanatında uzunmüddətli həbslər barədə hökm “əsassız”, “olduqca sərt” adlandırılır, Avropa İnsan Hüquqları Konvensiyasına uyğun olmadığı bildirilir.

“Həbs və istintaq kobud qanun pozuntuları ilə keçib. Saxlanılanlar işgəncələrə məruz qalıblar. Məhkəməyə qədər DİN rəhbərliyi təqsirsizlik prezumpsiyasını pozaraq “terrorçu”ların həbs olunduğunu bildirib”, - Mərkəzin rəhbəri Elşən Həsənov qeyd edib.

Müttəhimlərin Avropa İnsan Hüquqları Konvensiyasında təsbit edilən bir sıra hüquqları konvensiyanın aşağıdakı maddələri ilə pozulub: 7-ci maddə (müstəsna olaraq qanun əsasında cəza); 6 (ədalətli məhkəmə çəkişməsi); 13 (effektiv hüquqi müdafiə vasitəsi hüququ).

Məhkəmədə şahidlərə təzyiq göstərilib, vəkillərin vəsatəti təmin edilməyib, işgəncə faktları üzrə araşdırma aparılmayıb.

“Azərbaycan İnsan Hüquqları üzrə Konvensiyasını ratifikasiya edib və məhkəmə prosesləri normalarına əməl etməlidir. Bu barədə insan hüquqları üzrə beynəlxalq təşkilatlara məlumat veriləcək”, - E.Həsənov bildirib.

Xatırladaq ki, yanvarın 25-də məhkəmə “Müsəlman Birliyi” Hərəkatının lideri Taleh Bağırzadəni və onun müavini Abbas Hüseynovu 20 il, AXCP sədrinin müavini Fuad Qəhrəmanlını 10 il azadlıqdan məhrum edib. Digər 15 nəfər 10 ildən 19 ilədək azadlıqdan məhrum olunub.

Onlar terrorizm, konstitusiya quruluşunun dəyişdirilməsinə cəhd, kütləvi iğtişaşların təşkili, qanunsuz silah saxlanması, qətldə təqsirli bilinirlər.

Yerli hüquq müdafiəçiləri onları siyasi məhbus hesab edirlər.

Siyasi Məhbusların Monitorinqi Mərkəzi 2014-cü ilin oktyabrında bir qrup keçmiş vicdan məhbusu tərəfindən yaradılıb. —06D--