Söyüdlüdə qarşıdurma zamanı  10 nəfər xəsarət alıb, daha 6 nəfər saxlanılıb/YENİLƏNİB/ /YENİLƏNİB/

Bakı/21.06.23/Turan: Söyüdlü kəndində etiraz aksiyasının dağıdılması zamanı 10-a yaxın yerli sakin xəsarət alıb, daha 6 nəfər saxlanılıb. Bu barədə Turan-a yerli sakin Sürəyya Əliyeva məlumat verib.

O deyib ki, qızıl mədəninin turşu tərkibli sularının örüş torpaqlarında qurulmuş gölməçəyə axıdılmasının ekologiyanı pozması, sakinlər arasında xəstəliklərin yaranmasına səbəb olması ilə bağlı rəsmi qurumlara dəfələrlə şikayətlər edilib.

“Artıq kimyəvi tərkibli suların toplandığı bir göl dolub. İndi kəndin on metrliyinə ikinci göl qurmaq istəyrilər. Bu göllər kəndin örüş sahələrində qurulur. Yaşamaq mümkün deyil. Kənd sakinləri gölün qurulmasına etiraz edir. Bu zaman polis güc tətbiq etdi, gözyaşardıcı qazdan istifadə etdi. Kənd sakinləri arasında on nəfərədək xəsarət alanl var.  6 nəfər polis təırəfindən saxlanılıb. Bir qadın da xəsarət alıb. Onun bədənində, üzündə şişlər (qanşırlar-red) var. Əraziyə təcili tibbi yardım gəldi, xəsarət alanlara tibbi yardım göstərildi”, Əliyeva Amerikanın Səsinə deyib.

*   *   *

2023 İyun 20 (Çərşənbə axşamı) 23:02:50

Daxili İşlər Nazirliyi Gədəbəydə polisin etirazçıya qarşı gözyaşardıcı qazdan istifadə etməsi faktını araşdıracaq /YENİLƏNİB/

Bakı/17.06.23/Turan:  Bu gün günorta saatlarında Gədəbəy rayonu Söyüdlü kəndində bir qrup şəxs kənd ərazisində inşa olunan süni gölün tikintisinə qanunsuz müdaxilə edib.

DİN-in mətbuat xidmətindən bildirilib ki, həmin şəxslərə dəfələrlə xəbərdarlıq edilməsinə, izahedici söhbətlər aparılmasına baxmayaraq, onlar qeyd olunan əraziyə toplaşıblar.

Onlar polisin qanuni tələblərinə qəsdən tabe olmayaraq daşla, küt alətlərlə bir neçə fəhləyə xəsarət yetirib və polis əməkdaşlarına qarşı müqavimət göstərməyə cəhd ediblər. Görülmüş tədbirlərlə qanunsuz aksiyanın iştirakçıları ərazidən uzaqlaşdırılıblar.

O ki qaldı videogörüntülərdə polis əməkdaşının qadınlardan birinə gözyaşardıcı qaz tətbiq etməsi ilə əlaqədar DİN-in bir qrup əməkdaşı Gədəbəy rayonuna ezam olunub. Həmin fakt üzrə xidməti yoxlama aparılır.

Xidməti yoxlamanın nəticəsindən asılı olaraq məsələyə hüquqi qiymət veriləcəkdir.

Məlumatda  vətəndaşların etirazının səbəbləri göstərilmir.

Sosial şəbəkələrdə yayılan məlumata görə, etiraz aksiyası vətəndaşların kəndin yaxınlığında yerləşən qızıl yatağının işlənməsi zamanı zərərli maddələr olan tullantıların su anbarına axmasından narahatlıqları  ilə əlaqədar keçirilib.

Bildirilir ki, belə bir su anbarı artıq dolmuşdur və indi kəndin örüş sahələrində daha bir süni göl qurulur.—06B-

*   *   *

2023 İyun 20 (Çərşənbə axşamı) 17:52:50

Gədəbəydə etiraz aksiyası

Bakı/20.06.23/Turan: İyunun 20-də Gədəbəy rayonunun Söyüdli kəndinin sakinləri yerli əhalinin torpaq sahələrinin iri məmurlar tərəfindən zəbt edilməsi ilə bağlı etiraz aksiyası keçiriblər.

Polis gözyaşardıcı qazdan istifadə edərək aksiyanı dağıdıb, yerli mənbələr bildiriblər.

Öz növbəsində Daxili İşlər Nazirliyinin mətbuat xidmətindən Turan-a bildiriblər ki, iyunun 20-də günorta Gədəbəy rayonu Söyüdlü kəndinin bir qrup sakini süni su anbarının tikintisinə qanunsuz müdaxilə edib.

"Polis əməkdaşlarının qanuna əməl etməyən şəxslərlə profilaktik söhbətindən sonra onlar ərazidən kənarlaşdırılıb. Araşdırma aparılır", - Daxili İşlər Nazirliyinin mətbuat xidmətindən bildiriblər.06В