Sumqayıtda YNH ilə əlaqədar avtobus sürücüsü tutulub

Bakı/02.10.2019/Turan: Sentyabrın 30-da Bakı-Quba yolunun Sumqayıt şəhəri ərazisindən keçən hissəsində ağır yol qəzasına səbəb olan "Mersedes Benz 4140" markalı, 90-CT-969 dövlət qeydiyyat nişanlı yük avtomobilinin sürücüsü Qabil Məmmədov həbs edilib.

Bu barədə Baş Prokurorluğun oktyabrın 2-də yaydığı məlumatda deyilir.

Məlumata görə, fakt üzrə Daxili İşlər Nazirliyinin Baş İstintaq və Təhqiqat İdarəsinin yol nəqliyyat hadisələrinə dair işlər üzrə istintaq və təhqiqat şöbəsində Cinayət Məcəlləsinin 263.3-cü (Yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddəsi ilə cinayət işi başlanıb.

İş üzrə hadisə yerinə və nəqliyyat vasitələrinə baxış keçirilib, müvafiq ekspertizalar, o cümlədən məhkəmə-tibbi və məhkəmə yol-nəqliyyat hadisələri ekspertizaları təyin edilib, şahidlərin ifadəsi alınıb və s. zəruri istintaq hərəkətləri yerinə yetirilib.

Xatırladaq ki, sentybarın 30-da Hacı Zeynalabdin qəsəbəsin ərazisində baş verən qəzada iki nəfər həyatını ititib, 14 nəfər isə Sumqayıt Təcili Tibbi Yardım Xəstəxanasına yerləşdirilib. Oktyabrın 1-də daha iki nəfər xəstəxanada dünyasını dəyişib. Qalan 4 nəfərin müalicəsi isə hələ davam edir. -06D-