Taksi xidmətlərinin göstərilməsi üçün yeni qaydalar qüvvəyə minib

Taksi şirkətləri iyulun 1-dən qüvvəyə minən yeni qaydalara cavab verməyən avtomobillərin sürücülərinin profillərini bloklamağa başlayıb.

Taksi sürücülərindən biri Turan-a bildirib ki, şirkətlər artıq ötən həftədən 2006 və 2007-ci il istehsallı avtomobillərin sürücülərinə tətbiqə girişi bloklamağa başlayıb: "Bu gündən 2008-ci ilin maşınlarının sürücülərini də bloklamağa başlayıblar. Deyilənə görə, bu, mərhələli şəkildə baş verəcək".

Taksi şirkətlərdən məsələ ilə bağlı münasibət öyrənmək mümkün olmayıb.

Azərbaycan Yerüstü Nəqliyyat Agentliyindən isə Turan-a bildirilib ki, taksi minik avtomobili vasitəsilə sərnişindaşımalarla məşğul olmaq istəyənlər müvafiq icazələr əldə edərək fəaliyyətlərini davam etdirirlər: "Yaşı 15 ili keçməyən avtonəqliyyat vasitələri ilə taksi fəaliyyəti göstərmək istəyənlər 1 iyul tarixinədək icazə üçün müraciət edə bilərdi. Bu gündən sonra isə yalnız yaşı 8 ilə qədər olan nəqliyyat vasitələri icazə üçün müraciət edə biləcəklər. Həmçinin avtomobillərə "avro-5" standartı tələbi də bu gündən qüvvəyə minir. Taksilərin rənglərinin ağ və ya qırmızı olması ilə bağlı tələb 2024-cü il iyulun 1-dən sonra sərnişindaşımalarda istifadə olunması üçün idxal edilən və ya ölkədə istehsal olunan avtonəqliyyat vasitələrinə şamil edilir".

Agentlikdən qeyd olunub ki, bu günədək taksi fəaliyyəti üçün 11696 "Buraxılış kartı" alınıb, 24482 sürücü təlimlərə cəlb edilib: "Taksi fəaliyyətinə dair nəzarət mexanizminin həyata kecirilməsi üçün "AYNA" informasiya sistemində "E-taksi" alt sistemi yaradılıb. Hazırda operatorlar adsızlaşdırılmış məlumatları real vaxt rejimində həmin sistemə ötürürlər. "E-taksi" xidməti vasitəsilə sifarişi qəbul edən sürücünün icazəsinin olub-olmadığını izləmək mümkündür".

Vurğulanıb ki, AYNA əməkdaşları tərəfindən buraxılış kartlarının yoxlanılması həyata keçiriləcək: "Sözügedən icazəsi olmayan hüquqi şəxslər və ya fərdi sahibkarlar, eyni zamanda icazəsi olmayan şəxslərə sifariş ötürən taksi sifariş operatorları barəsində də Azərbaycan Respublikasının İnzibati Xətalar Məcəlləsinə uyğun olaraq müvafiq qaydada inzibati tənbeh tədbirləri görüləcək".