Təcavüz başlayandan rusiyalılar Ukraynada 41 uşaq öldürüblər, 76 uşaq yaralanıb

Kiyev/08.03.22/UNİAN: Bu günə olan məlumata görə, Rusiya Federasiyasının təcavüzü başlayandan Ukraynada 41 uşaq həlak olub, 76 uşaq yaralanıb. Bu barədə Ali Radanın insan hüquqları üzrə müvəkkili Lyudmila Denisova Telegram-a bildirib.

"Dnepropetrovsk vilayətinin hüquq-mühafizə orqanları tərəfindən Xarkovdan  daha 300 nəfər evakuasiya edilib. Xilas olunanlar arasında üç uşağı olan ana var, onlar gecə Rusiya artilleriyasının atəşinə məruz qalıblar. Atəş nəticəsində onun övladlarından biri xəsarət alıb. Həmçinin polislərlə söhbət zamanı qadın deyib ki, onların gözü qarşısında qonşunun uşağı həlak olub

Xarkov vilayətinin Derqaçi şəhərində Rusiya ordusunun atəşi zamanı Derqaçidəki 3 saylı liseyə və şəhərin yaşayış məhəllələrinə zərbələr endirilib. Ən azı üç nəfər həlak olub, 15 nəfər, o cümlədən 4 yaşlı uşaq yaralanıb ", - o qeyd edib.

Ombudsmanın sözlərinə görə, bu gün səhər məlum olub ki, Donetsk vilayətində daha 4 mülki şəxs, o cümlədən 14 yaşlı oğlan yaralanıb.

"Mariupol və Volnovax şəhərlərində ölən və yaralananların sayını müəyyənləşdirmək hələ də mümkün deyil. Bu şəhərlər Rusiyanın işğalçı qoşunları tərəfindən blokadaya alınmış şəhərlər olaraq qalır.

Nikolayev şəhərinin dinc əhalisi növbəti dəfə işğalçılar tərəfindən atəşə tutulub. Bu dəfə işğalçılar şəhərin cənub hissəsində Balabanovka yaşayış mikrorayonunu artilleriya  atəşinə tutublar, 60 evə ziyan dəyib.  Bombaların əksəriyyəti 1949-cu il Cenevrə Konvensiyası ilə bütün dünyada istifadə üçün qadağan edilmiş kaset bombaları olub.  Bu günlərdə rusiyalı düşmənlər Xarkovda 30-a yaxın ümumtəhsil məktəbinə, 27 uşaq bağçasına, 5 ali təhsil müəssisəsinə, uşaq internatlarına hücum ediblər", - Denisova bildirib.--0--