Təhsilin İnkişafı Fondu yaradılır

Bakı/14.07.21/Turan: Prezident İlham Əliyevin bu gün imzaladığı fərmana əsasən, hökumətə bir ay müddətində Təhsil Nazirliyinin tabeliyində publik hüquqi şəxs statuslu Təhsilin İnkişafı Fondunu yaratmaq tapşırılıb.

Fond təhsil sisteminin inkişafına yönəlmiş proqram və layihələri maliyyələşdirəcək, dövlət təhsil müəssisələrinin maddi-texniki bazasının müasir tələblərə uyğunlaşdırılmasına yardım edəcək.

Təhsilin İnkişafı Fondunun maliyyə mənbələri Təhsil Nazirliyinin tabeliyindəki təhsil müəssisələrinin (peşə təhsili müəssisələri istisna olmaqla) büdcədənkənar vəsaitləri, habelə ödənişli təhsil xidmətləri göstərilməsindən əldə etdikləri gəlirlərdən ödəmələrdir.

Təhsil Nazirliyinə iki ay ərzində tabeliyindəki təhsil müəssisələrinin gəlir və xərclərinin şəffaf, səmərəli və mərkəzləşdirilmiş qaydada idarə olunmasını təmin etmək məqsədilə onların büdcədənkənar vəsaitindən, habelə ödənişli təhsil xidmətləri göstərilməsindən əldə etdikləri gəlirlərdən Fonda ayırmaların məbləğini müəyyən etmək tapşırılır.

TİF-in yaradılmasının məktəbəqədər müəssisələrdə və məktəblərdə təmir və təsərrüfat mallarının alınması bəhanəsi ilə direktorlar səviyyəsində nəzarətsiz pul toplanmasına son qoyub-qoymayacağını zaman göstərəcək. -08D-