Tələbə Kredit Fondunun elanı

“Maarifçi” Tələbə Kredit Fondu təhsil krediti almaq istəyən tələbələr üçün növbəti elan sessiyasına başlayıb. Xəbəri Təhsil Nazirliyi yayıb.

Xəbərdə deyilir ki, elan 2016-2017-ci tədris ili üzrə təhsil alan və aztəminatlı ailələrdən olan tələbələrin təhsil haqqı borcu üçün nəzərdə tutulub.

Xəbərə görə, kreditlər üçün müraciət edən tələbələr Azərbaycan vətəndaşı olmalı, müvafiq təsisçi universitetlərin birində təhsil almalı və təhsilini davam etdirmək üçün maliyyə yardımına ehtiyacı  olmalıdır.         Təhsil kreditlərinin növləri və şərtləri, seçim meyarları və müraciət forması ilə bağlı ətraflı məlumat Fondun rəsmi saytında ( www.maarifci.az) qeyd olunub.

Bundan əlavə, portalda elektron (onlayn) müraciət pəncərəsi yaradılıb ki, bu da kreditlər üçün müraciət prosesində şəffaflıq və operativliyin təmin olunmasına xidmət edir.

Müraciətlər oktyabrın 31-dək qəbul ediləcək.

Fond Təhsil Nazirliyinin təşəbbüsü ilə yaradılıb və  2015-ci ilin oktyabrında QHT kimi Ədliyyə Nazirliyində qeydə alınıb. Fondun əsas missiyası təhsil haqqını ödəməkdə çətinlik çəkən aztəminatlı ailələrdən olan tələbələrə uzunmüddətli güzəştli kreditlər verməklə  onlara ali təhsil almaq imkanlarını yaratmaqdır.

Birinci elan sessiyasında Fondun seçim meyarları çərçivəsində 55 elektron müraciətə baxılıb, meyarlara cavab verən 22 tələbə ilə kredit müqaviləsi imzalanıb.

Fond təhsil, yataqxana, tədris materialları, elmi-tədqiqat, aradırma kimi kreditlər nəzərdə tutur. Amma Fond yeni yaradıldığı üçün 2016-cı ildə ancaq təhsil haqları üzrə kreditlər verir. Hər il tələbə 4 min manat olmaqla  illik 8%-lə 5 ildə 20 min manatlıq kredit götürə bilər. Tələbə bu krediti tələbəlik dövründə qaytara bilməsə də məzun olduqdan sonra ən geci 5 il müddətində qaytarmalıdır.   Kredit götürmək üçün zamin tələb edilmir.—0--