Foto TURAN.
Tofiq Yaqublunun barəsində hökmdən hiddətlənən fəallar məhkəmə binası qarşısında etiraz aksiyası keçiriblər
Bakı/03.09.20/Turan: Tofiq Yaqublunun qızı Nigar Həzi hökmü “rejimin siyasi qisası” adlandırıb.
Hakimiyyət bütün qırmızı xətləri keçib, artıq üçüncü dəfədir ki, T.Yaqublunu uzun müddətə azadlıqdan məhrum edib. O, atasının başladığı aclığa görə səhhətilə bağlı narahatlığını ifadə edib.
Əvvəlki həbs dövründə T.Yaqublunun sağlamlığı xeyli zəifləyib. 2019-cu ilin yanvarında bloger Mehman Hüseynova dəstək olaraq uzun müddət aclıq edib, daha sonra həmin ilin oktyabrında mitinqdən sonra işgəncələrə məruz qalıb, sonra isə əməliyyat keçirib.
“Əgər ona bir şey olarsa, məsuliyyəti şəxsən İlham Əliyev daşıyacaq”, - N.Həzi deyib.
“Bütün diktatorlar xalqlar qarşısında acizdir və Yaqubluya qarşı işin saxtalaşdırılmasında əli olanların hamısı nə vaxtsa öz cəzasını alacaq”,- o qeyd edib.
Məhkəmə qarşısına toplaşan fəallar “Azadlıq!”, “İstefa!” şüarlarını səsləndiriblər. Çoxsaylı polis qüvvələri toplaşanları binadan sıxışdırmağa başlayıb.
Müsavat Partiyasının lideri Arif Hacılı hökmü “ədalətsiz” adlandırıb.
“Tofiq Yaqublu, əlbəttə ki, cinayət törətməyib və cinayət işi onun siyasi fəaliyyətinə görə qisasdır. Bugünkü hökm bir daha göstərdi ki, Azərbaycanda hüquqi nihilizm hökm sürür, ədalət mühakiməsi sistemi tamamilə iflasa uğrayıb, hakimiyyətin dialoq haqda bəyanatı isə boş söhbətdən başqa bir şey deyil. Bu hökm hakimiyyətin cəmiyyətlə qarşıdurmaya getdiyini göstərdi”, - A. Hacılı deyib.
Hakimiyyət səhərdən məhkəmə binası ətrafında yüzlərlə polis yerləşdirib. “Müxalifətə, Müsavat Partiyasının üzvlərinə hətta küçədə dayanmağa imkan verilmir. Lakin 21- ci əsrdə hakimiyyətin cəmiyyətə belə münasibəti uzun ola bilməz”, - A.Hacılı deyib və T.Yaqublunun tezliklə azadlığa çıxacağına əminliyini ifadə edib.–06D-
Cəmiyyət
-
Həbsdə olan ictimai fəal, I qrup əlil Famil Xəlilov noyabrın 28-də yenidən aclıq aksiyasına başlayıb. O hazırda quru aclıq edir, su, dərman qəbulundan da imtina edib. Xəlilov “qanunsuz həbsinə” etiraz edir. Bu barədə Famil Xəlilovun həyat yoldaşı Kiçikxanım Xəlilova onunla dekabrın 1-də telefon danışığından sonra Turana deyib. “Famillə bu gün telefonla danışdım. O quru aclığı davam etdirdiyini, hətta dərmanlarının qəbulundan imtina etdiyini dedi. Bildirdi ki, dərman qəbul etmədiyindən gecələr yata da bilmir. Mənim yalvarışlarıma baxmayaraq o inadından dönmədi. Familə onun ev dustaqlığına buraxılması ilə bağlı verilən vədə noyabrın 28-də məhkəmədə əməl edilməməsi çox ağır təsir edib”, o qeyd edib.
-
17 saylı cəzaçəkmə müəssisəsində cəza çəkən Müsəlman Birliyi Hərəkatının (MH) fəalı Bəxtiyar Babaşov fiziki təzyiqə məruz qalıb. Bu barədə onun həyat yoldaşı, jurnalist və hüquq müdafiəçisi Arzu Abdulla məlumat verib. Noyabrın 30-da o, ərinin cəza çəkdiyi müəssisənin qarşısında etiraz aksiyası keçirib. O, ərinə və digər məhbuslara qarşı zorakılığın dayandırılmasını tələb edib.
-
Qışın ilk günüdə Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir. Gecə və səhər bəzi yerlərdə çiskinli olacağı, axşam isə arabir yağış yağacağı ehtimalı var. Şimal-qərb küləyi əsəcək.
-
Noyabr ayının 23-də saat 19:00-da Dövlət Sərhəd Xidmətinin Sərhəd Qoşunları Komandanlığının Xudat sərhəd dəstəsinin xidməti ərazisində Azərbaycan Respublikasından Rusiya Federasiyası istiqamətində Əlcəzair Xalq Demokratik Respublikası vətəndaşı–2002-ci il təvəllüdlü Chouaib Bendemagh, noyabrın 25-də saat 00:05-də Lənkəran sərhəd dəstəsinin xidməti ərazisində İran İslam Respublikasından Azərbaycan Respublikası istiqamətində İİR vətəndaşları–2004-cü il təvəllüdlü Rayenzadə Muhemmedrza Əli və 2008-ci il təvəllüdlü Mikayıllı Yeganə Nehmətulla dövlət sərhədini pozmağa cəhd göstərərkən saxlanılıb.
Rəy yaz