«Toplan» qarşıısnda aksiya

Bakı/15.07.21/Turan:  İyulun 15-də heyvan hüquqlarını müdafiə edən şəxslər «Toplan» - Sahibsiz itlərə qayğı mərkəzinin önündə aksiya keçirməyə cəhd edib.

Etirazçılar iddia edir ki, mərkəzdə küçədən topladığı itlər məhv edilir. "Biz hər həftə burada yığışacayıq, aksiyalarımızı davam edəcəyik ki, “Toplan” heyvansevərləri içəri buraxsın, öz əməlləri haqqında açıqlama versin, heyvanlara orada işgəncə verənlər cəza almalıdır. Bizim vergilərimizlə bura qurulubsa burada nə baş verdiyini biz bilməliyik", - aksiya təşkilatçılarından biri Elxan Mirzoyev bildirdi. 

Əraziyə cəlb olunmuş polis əməkdaşları aksiya iştirakçılarını hadisə yerindən uzaqlaşdırıldı. Aksiya iştirakçılarından Əhməd Məmmədli, Rüstəm İsmayılbəyli, Kamran Məmmədli, Rəvan Axundov, Fərid Cabbar, Nicat İsmayıl, Elmir Abbasov və Elxan Mirzoyev Sabunçu Rayonun 12-ci polis şöbəsinə aparıldı. 

Bir müddət sonra polis bölməsindən çıxan fəallardan bəziləri bildirib ki, onlar hər biri 400 manat məbləğində cərimələnərək sərbəst buraxıldı. "Bizə nəyə görə cərimələndiyimiz bildirilmədi, heç protokol da təqdim edilmədi. Sadəcə dedilər ki, Bakı Şəhər Baş Polis İdarəsinin tapşırığı belədir". 

Onların sözlərinə görə, Elxan Mirzoyev və Nicat İsmayıl isə Bakı Şəhər Baş Polis İdarəsinə aparılıb. Onlar da bir qədər sonra profilaktik söhbətdən sonra sərbəst buraxılıb.  

Məsələ ilə bağlı Daxili İşlər Nazirliyindən münasibət öyrənmək mümkün olmayıb. 

“Toplan” iddiaları təkzib etdi. "Bura dövlət idarəsidir və onların dedikləri mümkün deyil. Həmin şəxslərin hərəkətləri təxribat xarakterlidir", - deyə təşkilatdan bildiriblər.—06В-