Turkish Airlines reyslərində gecikmələr

Bu gün səhər İstanbulda Turkish Airlines aviaşirkəti işçilərinin tətili ilə əlaqədar yaranmış problemlər bu gün Bakıdan İstanbula uçan sərnişinlər üçün narahatlıqlar yaradıb.

Belə ki, səhər reysi təxirə salınıb və sərnişinlərə saat 14:45-də yola salınacaqları vəd edilib.

Günorta uçmalı olan sərnişinlərə gəlincə, onlara yalnız axşam, şirkətin 20:45 reysi ilə uçmağı vəd edirlər. Bu barədə Turan-a Turkish Airlines-ın Bakı nümayəndəliyindən bildiriblər. Nümayəndəlikdən gecikmələrin səhər təyyarəsində texniki nasazlıqlarla bağlı olduğunu iddia ediblər. -- 

***

Ötən gecə saat 3:00-dan Turkish Airlines aviaşirkətinin yüzlərlə əməkdaşı şirkətin baş ofisinin qarşısında tətilə başlayıblar.

CNN-Turk məlumat verib ki, tətilə səbəb əmək müqavilələri ilə bağlı narazılıq olub. Hələlik tətil aviareyslərin təxirə salınmasına səbəb olmayıb. 

Qeyd edək ki, pilotlar tətildə iştirak etmirlər.

Turkish Airlines şirkətinin Bakı nümayəndəliyindən Turan-a bildirilib  ki, Azərbaycandan olan aviareyslər adi qaydada davam edir. Səhər reysi kiçik yubanma ilə yola düşüb ki, bu da texniki səbəblərdən baş verib. Növbəti təyyarə cədvəl üzrə 14.45-də uçmalıdır. Türkiyədən də təyyarələr cədvəl üzrə gəlir. 16D06-