UBMM-də nevroloji uşaqlar çoxluq təşkil edir

2015-ci ildə  Uşaq Bərpa Müalicə Mərkəzinə (UBMM) 37247 xəstə gəlişi qeydə alınıb.

Mərkəzin baş həkimi tibb elmləri namizədi Cəmilə Talıbova “Turan” bildirib ki, UBMM-ə müraciət edən xəstələrin 40%-dan çoxunu nevroloji uşaqlar təşkil edir. Bu uşaqlar əsasən uşaq serebral iflici, bazu kələfinin doğuş travması, müxtəlif səbəblərdən inkişaf çətinlikləri olanlardır. Burda müalicə alan uşaqlarda sinir sistemi xəstəliklərilə yanaşı digər somatik xəstəliklər də müşahidə edilir. Mərkəzdə yanaşı gedən xəstəliklərin müalicəsi də aparılır.

2015-ci ildə Mərkəzə müraciət edənləin sayında artım müşahidə olunur. Baş həkim bunu xəstəliyin artması ilə deyil, əhali arasında aparılan maarifçilik işləri nəticəsində erkən müraciət edənlərin çoxalması ilə əlaqələndirir.

Onun dediyinə görə, 1988–ci ildən fəaliyyət göstərən mərkəz uşaqların  müayinəsini, çoxprofilli bərpa müalicəsini həyata keçirir, xəstə uşaqların fiziki və psixoloji reabilitasiyasına çalışır, erkən uşaqlıq dövrünə xas olan əlilliyin profilaktikas və qarşısının alınması üçün tədbirlər görür.

Onun dediyinə görə, mərkəziə müraciət edən uşaqların hər biri fərdi müalicə planı əsasında il ərzində 3 – 5 dəfə müalicə kursu keçirlər. Bunun üçün mərkəzdə sağlamlıq imkanları məhdud olan xəstələr (uşaq serebral iflici, əzələ distrofiyası, hərəkət sisteminin pozulmaları, pleksidlər) üçün bədən tərbiyəsi zalları, massaj, su terapiyası, qalvanik vannalar, istilik terapiyası, parafin, naftalan, elektroterapiya, trenajor otağı,  fəaliyyət göstərir. Burda loqoped və surdoloqoped kabinetləri də  var. Mərkəzdə dünya reabilitasiyasında geniş istifadə olunan və innovasion üsul sayılan kostyum terapiyası tətbiq edilir.  UBMM-də 18 yaşadək uşaqlar arasında bütün xroniki xəstəliklərin müalicəsi  aparılır.

 Mərkəzdəki  müalicə tədbirlərinə, o cümlədən bədən tərbiyəsi, aktiv terapiya, artterapiya və başqa terapiya prosedurlarına valideynlər də qatılır  və maariflənirlər.

 Mərkəz uşaqların sosial adaptasiyası üşün də layihələr həyata keçirir. Burda  Səhiyyə Nazirliyi və Paraolimpiya Komitəsinin təklifilə sağlamlıq imkanları məhdud uşaqlar üçün “Boçça” oyunu üzrə dərnək təşkil olunub.

C.Talıbova bildirib ki,  “I Milli Uşaq Paraolimpiya oyunlarında UBMM–in uşaqları da yüksək nəticələr göstəriblər. Mərkəzdə hər il sağlamlıq imkanları məhdud uşaqlar üçün şənlikləri keçirilir. Məqsəd bu uşaqlarla uşaqlarla sağlam uşaqlar arasında inteqrasiya yaratmaqdır. Bu xəstə uşaqlarda özünə inam hissini artırır və sosial adaptasiyaya kömək edir”.