VCMK hakimiyyəti siyasi məhbusları azad etməyə çağırıb

Vətəndaş Cəmiyyətini Müdafiə Komitəsi (VCMK) Azərbaycan hakimiyyətini bütün siyasi məhbusları azad etməyə və ictimai xadimlərə, KİV işçilərinə qarşı məhkəmə təqiblərinə son qoymağa çağırıb.

Müraciət cəzaçəkmə yerlərində, məhkəmə prosesləri və istintaq zamanı baş verən insidentlərin müzakirəsindən sonra qəbul edilib.

VCMK təhqirlərə məruz qalan keçmiş səhiyyə naziri Əli İnsanovun, oktyabrın  16-da 2 saylı koloniya rəhbərliyi tərəfindən döyülən İlqar Məmmədovun həyatına təhlükədən narahatlığını bildirib.

Avropa məhkəməsi hər iki ictimai xadimin dərhal azadlığa buraxılması barədə qərar çıxarıb. Onlar müntəzəm olaraq koloniya administrasiyası tərəfindən psixoloji təzyiqlərə məruz qalırlar.

Həbsdə olan jurnalist Pərviz Həşimlinin azad edilməsi ilə bağlı işinə yenidən baxılması məqsədəuyğun sayılıb.

P.Həşimliyə qarşı cinayət işini saxtalaşdıran MTN əməkdaşları  - Elçin Quliyev və İlqar Əliyev nazir Eldar Mahmudov işdən çıxarıldıqdan sonra cinayət məsuliyyətinə cəlb olunublar.

Komitə üzvləri tanınmış jurnalist Rauf Mirqədirovun məhkəməsinin şəffaf keçirilməsinin təmin olunmasına çağırıblar.

Komitə hakimiyyəti həbsdə olan ictimai xadimlər Leyla və Arif Yunusların yaxınları və doğmaları ilə görüşünün təmin olunmasına, onlara qarşı qərəzli münasibətə son qoyulmasına çağırıblar.

Reportyor Rasim Əliyevin ölüm işi üzrə istintaqın yubadılmasına diqqət yönəldilib. Komitə qətlin ədalətli araşdırılması üçün mərhumun atasının dövlət başçısına müraciətini dəstəkləyib.

REAL hərəkatının lideri İlqar Məmmədovun koloniya rəhbərliyi tərəfindən döyülməsi faktının araşdırılması və onların cəzalandırılması üçün ədliyyə nazirinə və baş prokurora müraciət qəbul edilib.

*VCMK 2009-cu ildən fəaliyyət göstərir. Özündə bir neçə QHT və KİV-i birləşdirir.—0—