Vəkil: �Aleksandr Lapşin Azərbaycanın ərazi bütövlüyünə hörmətlə yanaşır�

Bakı/22.06.17/Turan: Bu gün Bakı Ağır Cinayətlər Məhkəməsində bloger Aleksandr Lapşinin işi üzrə hazırlıq iclası keçirilib.

Rusiya, Ukrayna və İsrail vətəndaşı olan A.Lapşin Azərbaycanın işğal edilmiş ərazilərinə qanunsuz səfər etdiyinə və ölkənin ərazi bütövlüyünə qarşı çağırışlar etdiyinə görə cinayət məsuliyətinə cəlb olunub.

2016-cı ilin sonlarında o, Belarusda saxlanılıb. 2017-cı il fevralın 7-də Azərbaycana ekstradisiya edilib. Onu bir neçə il həbs cəzası gözləyir.

Müstəqil mətbuatın nümayəndələri hazırlıq iclasına buraxılmayıb.

Prosesə ancaq hökumətyönlü KİV-dən bir neçə jurnalist və Ədliyyə Nazirliyi yanında İctimai Şuradan üç hüquq müdafiəçisi buraxılıb.

Bundan əlavə, prosesi RF, İsrail və Ukrayna səfirliklərinin nümayəndələri izləyiblər.

İclas iştirakçılarından biri bildirib ki, proses zamanı hakim Əlövsət Əliyev A.Lapşindən özü barədə məlumatları soruşub.

Bloger bildirib ki, 1976-cı ildə anadan olub, hazırda daimi yaşadığı ölkə İsraildir.

Prokuror Nəsir Bayramov işin məhkəmə istintaqına göndərilməsini və həbs qətimkan tədbirinin qüvvədə saxlanmasını məhkəmədən xahiş edib.

Lapşinin vəkili Eduard Çernin Azərbaycanda blogerin yaşadığı yerin olmamasına görə buna etiraz etməyib.

Məhkəmə dinləmələri iyunun 30-na təyin edilib.

Prosesdə iştirak edən Ukraynanın Azərbaycandakı səfiri Boqdan Sergeyçuk jurnalistlərlə qısa söhbət edib: "Bu, hazırlıq iclası idi. Aleksandr Lapşinin hüquqlarının pozulduğunu güman etməyə əsas yoxdur".

Rusiya və İsrail səfirliklərinin nümayəndələri şərh verməkdən imtina ediblər.

A.Lapşinin vəkili iclasın yekunlarını Turan-a şərh edərkən deyib ki, "bütün məsələlər qanun çərçivəsində həll edilib".

Onun sözlərinə görə, A.Lapşin hər hansı bəyanatla çıxış etməyib və işin baxılmaq üçün məhkəməyə verilməsinə etiraz etməyib.

O, saxlanma şəraitindən şikayət etmir. Təcridxananın tibb məntəqəsində həkim nəzarətindədir.

Bununla belə, vəkil qeyd edib ki, "təbii ki, Aleksandr Lapşin həbsdə saxlanmasından razı ola bilməz".

A.Lapşin özünü günahkar sayırmı? Bu sualın cavabında vəkil deyib ki, bloger özünü "qismən günahkar" sayır. O etiraf edir ki, Dağlıq Qarabağa - Azərbaycanın işğal olunmuş ərazilərinə gedib.

Vəkil qeyd edib ki, A.Lapşin dünyanın 126-dan çöx ölkə və regionuna səfər edib. O, Dnestryanı, Abxaziya, Suriyada olub. A.Lapşin bildirib ki, bu səfərlərdə məqsədi münaqişəli regionlarda vəziyyətlə şəxsən tanış olmaq, həmin yerlərdə yaşayan insanların durumunu görməkdir. O, Qarabağa da bu məqsədlə səfər edib. Vəkilin sözlərinə görə, A.Lapşinin Azərbaycana qarşı pis niyyəti olmayıb.

"Aleksandr Lapşin Azərbaycanın ərazi bütövlüyünə hörmətlə yanaşırmı" sualına vəkil müsbət cavab verib.

Vəkilin fikrincə, A.Lapşinə qarşı irəli sürülən ittihamların əsası yoxdur. Ancaq o, bu barədə danışmaqdan çəkinib. E.Çernin hesab edir ki, A.Lapşinə bəraət verilməsinə əsas var.-03C06--