Vəkil: «BMCQMİ-də Elgiz Qəhrəmanlıya işgəncə veriblər»

NİDA Hərəkatının fəalı Elgiz Qəhrəmanlının həbsindən bir həftə sonra vəkil Nemət Kərimli Kürdəxanı təcridxanasında onunla görüşə bilib. E.Qəhrəmanlı avqustun 19-da penitensiar müəssisəyə köçürülüb. Bundan öncə, avqustun 12-dən o, DİN Baş Mütəşəkkil Cinayətkarlığa Qarşı Mübarizə İdarəsində saxlanılıb.

Fəal vəkilə bildirib ki, DİN-də ona işğəncə veriblər.

N.Kərimli Turan-a bildirib ki, E.Qəhrəmanlıdan tələb ediblər ki, qanunsuz narkotik maddə dövriyyəsi və ABŞ-da yaşayan din xadimi Fətullah Gülənlə əlaqələrini etiraf etsin.

Gənc fəal işgəncələr altında etirafedici ifadələr verib.

Lakin avqustun 19-da o, vəkilə deyib ki, BMCQMİ-də verdiyi ifadələrdən imtina edir və işgəncələrlə bağlı prokurorluğa şikayət yazıb.

E.Qəhrəmanlı deyib ki, idarənin Şahlar adlı əməkdaşı  onun cibinə narkotik maddəni özü qoyub və onun üzərindən 3,315 qr. heroini özü çıxarıb.

E.Qəhrəmanlıya qarşı CM-in 234.4.3 maddəsi (külli miqdarda qanunsuz narkotik maddə dövriyyəsi) ilə ittiham irəli sürüb.

İdarədə həmçinin E.Qəhrəmanlıdan gənclər təşkilatlarının fəaliyyəti barədə soruşublar.

DİN-dən şərh almaq mümkün olmayıb.—06D--