Xəbərdarlıq: Xəzər dənizində dalğanın hündürlüyü 6 metrə çatacaq

Bakı/03.05.21/Turan: Nəqliyyat, Rabitə və Yüksək Texnologiyalar Nazirliyi yanında Dövlət Dəniz Agentliyi Xəzər dənizi akvatoriyasında müşahidə edilən hava şəraitilə əlaqədar xəbərdarlıq yayıb.

Xəbərdarlıqda deyilir ki, mayın 5-i səhər saatlarından Orta Xəzərdə şimal-qərb küləyi 18-23 metr/saniyə, arabir 25-28 metr/saniyə olacaq, gündüz açıq dənizdə arabir 30 metr/saniyəyədək güclənəcək. Dənizdə dalğanın hündürlüyü 2-3 metr, sonrakı inkişafda 4-6 metrə çatacaq.

Dəniz Agentliyi bildirir ki, hava şəraitinə uyğun olaraq gəmilərin təhlükəsiz şəkildə lövbər sığınacaqlarında dayanması təmin ediləcək.

“Gəmilər müvafiq lövbər sığınacaqlarına yerləşdirildikdən sonra onların təhlükəsiz şəkildə lövbərdə dayanması prosesi  radarlar vasitəsilə fasiləsiz olaraq müşahidə ediləcək.  Dövlət Dəniz Agentliyinin Gəmilərin Uzaq Məsafədən Tanınma və İzləmə Milli Mərkəzi tərəfindən gəmilərin hərəkətinə və limanlara hava şəraitinə uyğun olaraq giriş-çıxışa icazə verilməsi, hərəkətin məhdudlaşdırılması və limanların bağlanması ilə bağlı müvafiq tədbirlər görüləcək”,-  xəbərdarlıqda qeyd edilir. -0-