Xətai məhkəməsi Afiyəddin Məmmədovun həbsindən və cərimələnməsindən verilən şikayəti təmin etməyib

Bakı/04.08.23/Turan: Bu gün Bakının Xətai Rayon Məhkəməsi “Demokratiya 1918” Hərəkatı yanında Həmkarlar İttifaqları Konfederasiyasının sədri Afiyəddin Məmmədovun Bakı Şəhər Baş Polis İdarəsinin polis əməkdaşları tərəfindən saxlanılması və barəsində inzibati cərimə tətbiq edilməsi ilə bağlı şikayətini təmin etməyib. 

Bu barədə "Turan"a “Demokratiya 1918” Hərəkatının rəhbəri Əhməd Məmmədli məlumat verib.

Onun sözlərinə görə, M.Məmmədovun özü prosesə gətirilməyib, vəkili də etiraz olaraq prosesdə iştirakdan imtina edib.

Məmmədli bildirib ki, bu qərardan apellyasiya şikayəti veriləcək.

O, həmçinin qeyd edib ki, Məmmədov avqustun 2-də Daxili İşlər Nazirliyinin inzibati qaydada həbs edilən şəxslərin saxlandığı təcridxanasına yerləşdirildiyi gündən orda aclıq aksiyasını davam etdirir.

Məmmədov təcridxanada əsassız həbs edilməsinə, cərimələnməsinə və telefon danışıqları hüququndan məhrum edilməsinə etiraz edir.

Məmmədlinin sözlərinə görə, Məmmədovun 30 sutkalıq həbslə bağlı verdiyi apellyasiya şikayətinə baxılacağı tarix hələ müəyyən edilməyib.

Məmmədli avqustun 1-də saxlanılıb. Ertəsi gün Bakı şəhəri Xətai Rayon Məhkəməsi Məmmədovu İnzibati Xətalar Məcəlləsinin 528.1-ci (Məhkəmə və digər orqanların qərarlarının icrası ilə bağlı icra məmurunun tələblərini yerinə yetirməmə) maddəsi ilə təqsirli bilərək, 500 manat məbləğində cərimələyib. 

Bundan başqa, həmin gün Yasamal Rayon Məhkəməsi Məmmədovu İnzibati Xətalar Məcəlləsinin 535.1-ci (polisə tabe olmama) maddəsi ilə təqsirli bilərək, 30 sutka inzibati həbs qərarı verib.

Bundan əvvəl Daxili İşlər Nazirliyi bildirmişdi ki, Məmmədov “məhkəmə tərəfindən müəyyən edilmiş borc öhdəliklərini ödəmədiyinə görə axtarışa verildiyinə görə” saxlanılıb və 30 sutka müddətinə həbs edilib.

"Demokratiya 1918" Hərəkatı onun həbsini yol hərəkəti qaydalarında edilən dəyişikliklər səbəbindən motorollerlərinin müsadirə edilməsindən narazılıqlarını bildirən ərzaq çatdıran kuryerlərin etirazı ilə əlaqələndirir.

Məmmədov “Demokratiya 1918” Hərəkatı yanında Həmkarlar İttifaqları Konfederasiyasının rəhbəri olmaqla, kuryerlərin və digər fəaliyyət sahələrində çalışan işçilərin əmək hüquqlarının müdafiəsi ilə  fəal şəkildə məşğul olur.

**“Demokratiya 1918” Hərəkatı yanında Həmkarlar İttifaqları Konfederasiyası özünü iqtidaryönlü Azərbaycan Həmkarlar İttifaqları Konfederasiyasına alternativ kimi göstərir. -06В-