Xətai rayon polisi fəalın mətbuatla ünsiyyətini qadağan edir

Bakı/10.09.19/Turan: Turan-da dərc olunmuş "Xətai rayon sakinləri DİN-in hərkətsizliyinə qarşı etiraz aksiyasına çıxacaqlar" sərlövhəli məqalənin qəhrəmanı Natalya İorina bazar ertəsi Xətai Rayon Polis İdarəsinin rəisi İlqar Məmmədovun yanına çağırılıb.

Məqalə Aşıq Qurban küç., 19 ünvanında yerləşən binanın sakinlərinin münaqişəsinə həsr olunub. Bu evin sakinləri həyətlərində kommersiya obyekti tikilməsinə etiraz edirlər, belə ki, bu obyekt bütün ümumi həyəti zəbt edəcək. Qonşuların şikayətlərinə cavab olaraq obyekt sahibləri - sahibkar Pərvanə Novruzova və oğulları 2018-ci ilin noyabrında şikayətçilərə hücum ediblər, İorinanı və digər ev sakinlərini döyüblər. Dava polisin gözü qabağında və "Təhlükəsiz Şəhər" videomüşahidə kameraları önündə baş verib. Sakinlərin şikayəti ilə cinayət işi açılıb. http://www.contact.az/ext/news/2019/9/free/Want%20to%20Say/ru/83590.htm

"Görüşdə polis rəisi deyib ki, cinayət işi ilə bağlı mətbuata danışmamalıyam. Onun sözlərinə görə, mən zərərçəkmiş kimi tanınmamışam, amma, sən demə, hələ də (10 ay keçdikdən sonra) iş üzrə şahid kimi keçirəm", deyə İorina bildirib.

Onun sözlərinə görə, Novruzovanın və oğullarının ev sakinlərinə hücumunu əks etdirən videogörüntülər işdən çıxarılıb. Bu görüntülər araşdırma yeni başladığı zaman işdə var idi və baş müstəntiq polkovnik-leytenant Rəhman Kərimov onları İorinaya göstərmişdi.

"Həmçinin, Kərimova təqdim etdiyim, onun da qəbul etdiyini təsdiq etdiyi döyülmüş vətəndaşların vəziyyəti haqqında xəstəxanadan alınmış çıxarış da işdə yoxdur", deyə İorina qeyd edib.

Polisin jurnalistlərə araşdırmanın gedişatı haqqında məlumat verməyə son qoyması tələbinə baxmayaraq, İorina buna əməl etmək niyyətində deyil. O, qonşuları ilə birlikdə polisin hərəkətsizliyinə etiraz etmək üçün yenidən piketə çıxmaq niyyətindədir. -0-