Xocalı faciəsinin 30 illiyilə əlaqədar tədbirlərə görə avtobus marşrutları dəyişdirilib

Bakı/25.02.22/Turan:  Xocalı faciəsi qurbanlarının abidəsinə yürüş ilə əlaqədar 26 fevral səhər saat 7:00-dan 20 sərnişin avtobusunun marşrutları dəyişdiriləcək. Bu barədə cümə günü Bakı Nəqliyyat Agentliyi  məlumat yayıb.

Bunlar əsasən aşağıdakılardır:  1, 2, 4, 5, 6, 10, 18, 21, 30, 32, 46, 49, 53, 65, 88, 125, 127, 175, 205 və H1.

Bu marşrutlarda avtobusların hərəkəti paytaxtın alternativ küçə və prospektləri ilə təşkil olunacaq, məlumatda bildirilir.

Xocalı qurbanlarının abidəsi metronun "Xətai" stansiyasının qarşısındadır. Abidənin qarşısına yürüş "Azadlıq" meydanından başlayır, Neftçilər prospekti, Yusif Səfərəliyev küçəsi və Xocalı prospektindən keçir.

* 1992-ci il fevralın 25-dən 26-na keçən gecə erməni birləşmələri keçmiş sovet ordusunun 366-cı alayının dəstəyilə Dağlıq Qarabağın ikinci böyük şəhəri və azərbaycanlı əhalinin yaşadığı Xocalı şəhərini işğal edib. 613 nəfər xüsusi qəddarlıqla qətlə yetirlib, 150 nəfər itkin düşüb, 700-dən çox adam yaralanıb və girov götürülüb.-02D-