Yasamal məhkəməsi jurnalistin şikayətini araşdırır

Dekabrın 2-də Yasamal Rayon Məhkəməsində Azər Tağıyevin sədrliyi ilə Turan agentliyinin və “Amerikanın səsi” radiosunun müxbiri Tapdıq Fərhadoğlunun Yasamal Rayon Prokurorluğunun müstəntiqi Mübariz Əsədova qarşı şikayətinə baxılıb.

Şikayət BDU tələbələrinin etiraz aksiyasının işıqlandırılması zamanı jurnalistə hücumla bağlı cinayət işinin qaldırılmasından imtina ilə əlaqədar verilib.

Xatırladaq ki, fevralın 20-də BDU mühafizə xidmətinin rəhbəri Mahir Xocatov etiraz aksiyasını çəkən jurnalistə arxadan bir neçə zərbə endirib, kürəyinə və başına vurub.

Jurnalistin nümayəndəsi Samirə Ağayeva bildirib ki, insidentdən sonra onun vəziyyəti pisləşib, ayağında və kürəyində ağrılar artıb.

Martın 19-da məhkəmə-tibbi ekspertiza onun sağ ayağında xəsarətin olduğunu təsdiqləyib və bunun fevralın 20-də aldığı zədələrin nəticəsi olduğunu istisna etməyib.

Aprelin əvvəlində T.Fərhadoğlunun vəziyyət kəskin pisləşib və dərmanlar kömək etməyib.

Həkimlər onda fəqərə sümüyünün yerindən oynadığını bildiriblər. Aprelin 10-da T.Fərhadoğlunun fəqərə sümüyüdə əməliyyat aparılıb. Bundan sonra da jurnalistin durumu tam bərpa olunmayıb. Həkimlər ona ömürlük olaraq 5 kq.-dan artıq yük qaldırmamağı tövsiyə ediblər.

T.Fərhadoğlunu müayinə edən cərrah Zaur Aslanovun verdiyi rəyə görə, zədə ağırlaşdırıcı fakt ola bilərdi.

Lakin jurnalistin vəsatəti ilə təyin edilən təkrar ekspertiza “adi itələmədən” belə xəsarətlərin olmaması səbəbindən bu cür əlaqəni “inandırıcı” hesab etməyib.

Qeyd edək ki, cinayət işinin qaldırılmasından imtina barədə qərar mayın 10-da qəbul edilib, baxmayaraq ki, ikinci ekspertiza haqda rəy 9 iyun tarixlidir.

İclas zamanı müstəntiq Əsədov bunu onunla izah edib ki, qərarın surətinin çapı zamanı tələskənliyə yol verib və “səhvən” həmin tarixi göstərməyib.

S.Ağayevanın “nə üçün müstəntiq cinayət işinin qaldırılmasından imtina barədə qərar haqda Fərhadoğlunu xəbərdar etməyib və  təkidli tələblərdən sonra yalnız sentyabrın 12-də sənədi verib” sualına  müstəntiq ağlabatan cavab verməyib.

S.Ağayeva həmçinin deyib ki, müstəntiq qərar qəbul edərkən əməliyyatı aparan cərrahın rəyini nəzərə almayıb.

Bundan əlavə, Əsədov çoxsaylı şahidləri dindirməyib, istintaqa təqdim olunan videomateriallar qəbul olunmuş qərarda əksini tapmayıb.

Həmçinin S.Ağayeva diqqəti BDU mühafizə xidmətinin rəhbəri Xocatovun və onun tabeliyində olanların əməllərində CM-in 163-cü maddəsində (jurnalistin qanuni fəaliyyətinə maneçilik törədilməsi) nəzərdə tutulan əlamətlərin olmasına yönəldib.

Müstəntiq deyib ki, bu maddənin tətbiqi düzgün deyil, çünki jurnalistlər “birbaşa çəkiliş aparmayıblar”. Lakin hakim A.Tağıyev özü müstəntiqin fikirlərini təkzib edib.

Sonra prosesdə videomateriallara baxış olub. Onların bir hissəsinə baxmaq mümkün olmadığından baxışın növbəti iclasa keçirilməsi qərara alınıb. İclasın tarixi bir qədər sonra elan ediləcək.-06В-