Yeni İnternet resurs - Azerbaijan oil wiki

Berlində yerləşən OpenOil  konsaltinq şirkəti və nəşri Turan agentliyi ilə birlikdə bu gündən Azerbaijan oil wiki layihəsini buraxır.  Bu, artıq bir neçə ildir mövcud olan OpenOil Wiki saytının Azərbaycan və ingilis dillərində bölməsidir. 

Layihə neft və qaz istehsal edən ölkələri əhatə edir və bu günədək 11 ölkə üzrə bölmələri var. Azərbaycan  12-ci ölkə olacaq.  

Saytın materialları ingilis, fransız, ispan, ərəb dillərində təqdim olunub. Bundan sonra həm də Azərbaycan dilində təqdim olunacaq.

“Məqsədimiz neft-qaz sənayesi haqqında məlumatın  yayılması, ictimaiyyətin maarifləndirilməsi və  hökuməti daha da hesabatlı etmək cəhdləridir”, - Reportyorların Azadlığı və Təhlükəsizliyi İnstitutunun ofisində keçirilən təqdimat zamanı Open Oil  layihəsinin koordinatoru Lüsi Volvork bildirib. 

Onun sözlərinə görə, Azerbaijan oil wiki  (az.wiki.openoil.net) layihəsində məqsəd karbohidrogen sektoru üzrə yerli idarə olunan məlumatlı icmaların yaradılmasına yardım göstərmək məqsədilə vətəndaşlar üçün doğma dildə informasiya ehtiyatının genişləndirilməsidir.

   Layihə  yerli jurnalistlər, vətəndaş cəmiyyətinin fəalları, hökumət məmurları və Azərbaycanın hasilat sənayesi haqqında daha geniş məlumat-sorğu əldə etmək istəyən ictimaiyyət nümayəndələri üçün nəzərdə tutulub. 

Platforma Wikipedia prinsipi üzrə fəaliyyət göstərəcək -  daim yenilənəcək və əlavələr olunacaq. “Hamıya məlumdur ki, Azərbaycanda obyektiv və şəffaf informasiyanın əldə olunması ciddi problemdir. Energetika sahəsi də istisna deyil və bu layihə sözügedən problemin həllinə, resursun Azərbaycandilli istifadəçilərinə bir çox mənbədən neytral və maksimum obyektiv informasiyanın çatdırılmasına yönəlib”, - Turan agentliyinin direktoru Mehman Əliyev bildirib.

Hazırda saytda son 100 ildə Azərbaycanın neft-qaz sahəsini əhatə edən 45 min söz həcmində informasiya yerləşdirilib.  Saytın bölmələrində neft və qaz sahəsinə dair müəssisələr, infrastruktur, müqavilələr, layihələr, beynəlxalq münaqişələr və siyasi məsələlər haqda məlumat almaq olar. 

“Bu, çox faydalı və mühüm təşəbbüsdür. Layihə hər cür alqışlanmalı və dəstəklənməlidir. Mən onun fəal istifadəçilərindən biri olacağam. Orada yerləşdirilən məlumatlar ölkənin energetika sahəsi haqda obyektiv və hərtərəfli məlumat almaq üçün olduqca lazımdır”, - Neftçilərin Hüquqlarını Müdafiə Komitəsinin rəhbəri Mirvari Qəhrəmanlı təqdimat zamanı bildirib.

Qeyd edək ki, layihə Amerikanın İREX təşkilatının dəstəyi ilə həyata keçirilir.-02V-