Ziyafət Abbasova ruhi-əsəb dispanserinə yerləşdirilməsinin təfərrüatları barədə

Bakı/08.06.23/Turan: Azərbaycan Demokratiya və Rifah Partiyasının üzvü Ziyafət Abbasova məcburən ruhi-əsəb dispenserinə  yerləşdirilməsinin detallarından danışıb.

Onun sözlərinə görə, 6 iyun saat 11:00-da beş polis əməkdaşı Zabrat qəsəbəsində yaşadığı sığınacağa gələrək onu 15-ci polis bölməsinə aparıblar.

“Xahiş elədim ki, əynimi dəyişim, dərmanları götürüm, imkan vermədilər. Orada bir neçə saat qaldım. Polisdə dedim ki, dərmanlarımı gətirsinlər, amma gətirmədilər. Orada vəziyyətim pisləşdi", - Abbasova Turan agentliyinə bildirib.

Sonra bildirib ki, onu Respublika Ruhi-Əsəb Dispanserinə aparıblar.

"Orada mənimlə yaxşı davrandılar, dinlədilər, dərmanımı gətirdilər. Dünən dedilər ki, məndə ruh pozğunluğu yoxdur, tam sağlamam. Baş həkim mənimlə bir saat söhbət elədi", - Abbasova qeyd edib.

Axşam onu 3 saylı şəhər xəstəxanasına aparıblar,  işçilərdən şikayəti yoxdur.

Eyni zamanda fəal bildirib ki, mobil telefonu polis bölməsində qalıb və hələlik  ona qaytarmayıblar.

"Bölməyə gətirəndə  telefonumu verməyimi tələb etdilər.  Fikirləşdilər ki,  məni apararkən  videoya nəsə çəkmişəm",-Abbasova deyib.

Ziyafət Abbasova  hesab edir ki, ona qarşı bu hərəkətlər polis tərəfindən törədilib və səbəb onun öz hüquqlarını müdafiə etməsi və hakimiyyəti tənqid etməsidir.

Daxili İşlər Nazirliyindən şərh almaq mümkün olmayıb. – 06B-