14 may aksiyasından geriyə nə qaldı? – Təşkilatçılar “Çətin sual` qarşısında

Bakı/16.05.22/Turan: Bir qrup ictimai fəal mayın 14-də Bakının Fəvvarələr Meydanında etiraz aksiyası keçiriblər. Aksiya ictimai-siyasi xadimlərə qarşı artan fiziki zorakılıq və təhdidlərə etiraz məqsədi daşıyıb. Aksiyasının təşkilatçılarının əksəriyyəti aksiya başlamadan öncə polis tərəfindən saxlanılıb. Bununla belə, yürüş- aksiya baş tutub. Onlarla fəal çoxsaylı polis və jurnalistlərin müşayiətilə Fəvvarələr Meydanından Daxili İşlər Nazirliyinin binasına tərəf irəliləyib. Ancaq binaya 100 metr qalmış polis iştirakçıları ayırmağa başlayıb və onların hərəkəti davam etdirməsinə maneəçilik törədib.

Polisin aksiyanı dayandırmaq cəhdləri müvəqqəti nəticə verib. Onlarla iştirakçını bir müddət bloklayandan sonra polis  onlara hərəkətə davam etməyə və mitinqi tamamlamağa icazə verib.

"Mafiya gücünə yox!", "Zorakılığa yox!" şüarları səsləndirərək, fəallar hərəkətə davam edərək Daxili İşlər Nazirliyinin binasına yaxın çıxıb, aksiyanın qətnaməsini oxuyublar.

Aksiya barəsində təşkilatçılar ictimai fəal Bəxtiyar Hacıyev və “Müdafiə xətti” hüquq müdafiə təşkilatının həmtəsisçisi Zaur Əkbər Kamran Mahmudovun təqdimatında yayımlanan “Çətin sual” verilişində danışırlar.