Azərbaycan-Ermənistan-Rusiya üçtərəfli Işçi qrupu nəyi müzakirə edir? – Rauf Mirqədirov saat 16:00-da “Çətin sual" qarşısında

Bakı/18.08.21/Turan: Azərbaycan Baş nazirinin müavini Şahin Mustafayev, Ermənistan Baş nazirinin müavini Mher Qriqoryan və Rusiya Baş nazirinin müavini Aleksey Overçuk avqustun 17-də Moskvada üçtərəfli İşçi Qrupunun işini bərpa etdi.

Rusiya hökumətinin bəyanatında deyilir ki, Çərşənbə axşamı günü keçirilən görüşdə tərəflər Cənubi Qafqaz regionunda nəqliyyat kommunikasiyalarının bərpasının perspektivlərini və Azərbaycan, Ermənistan və Rusiya liderlərinin 11 yanvar 2021 -ci il tarixli bəyanatı çərçivəsində gələcək işlərin gedişatını müzakirə etdilər.

Qeyd edək ki, Ermənistanın nəqliyyat kommunikasiyalarının açılmasından imtina etməsi səbəbindən Işçi qrupunun iclası uzun müddət keçirilmirdi. Bəs indi nə baş verdi? Görüşün baş tutmasını Ermənistanın, Paşinyanın yola gəlməsi  kimi qələmə vermək olarmı? Yaxın vaxtlarda Ermənistanla sülh müqaviləsi imzalana bilərmi?

Bütün bu suallara siyasi şərhçi Rauf Mirqədirov saat 16:00-da Kamran Mahmudovun təqdimatında yayımlanan “Çətin sual” verilişində cavab verəcək.