Bəxtiyar Hacıyev niyə həbsdə saxlanıldı? – Nəsimi Məmmədli saat 16:00-da Çətin sual qarşısında

Bakı/21.12.22/Turan: Dekabrın 20-də Xətai Rayon Məhkəməsi ictimai fəal Bəxtiyar Hacıyevin ev dustaqlığına buraxılması barədə vəsatəti təmin etməyib. ABŞ Dövlət Departamenti bir daha onu azad etməyə çağırıb.

"Ötən həftə biz Bəxtiyar Hacıyevin İnsan Hüquqları Günü ərəfəsində həbsi ilə bağlı narahatlığımızı bildirmişdik", deyə mətbuat katibi Ned Prays gündəlik brifinqdə bildirib.

Azərbaycanın bir qrup vətəndaş cəmiyyəti nümayəndəsi ictimai fəal,  xuliqanlıq və məhkəməyə hörmətsizlik ittihamı ilə həbs edilən Bəxtiyar Hacıyevin istintaq təcridxanasında aclıq etməsindən dərin narahatlığını bildirib.

“Ermənistanla sülh müqaviləsilə bağlı danışıqlar prosesinin getdiyi, İranla münasibətlərin pisləşdiyi vaxtda daxili gərginliyə səbəb ola biləcək addımları ölkəmizin milli maraqlarına zidd hesab edirik. Siyasi təzyiq vasitəsi kimi təqsirsiz adamların həbsi praktikasını daxili siyasi gərginliyin əsas mənbəyi sayırıq”, - bəyanat müəllifləri qeyd edirlər. 

Müəlliflər Hacıyevi aclığı dayandırmağa, hökuməti isə ona qarşı ədalətsiz qərardan imtina etməyə çağırıblar.

Müraciətin müəlliflərindən biri Nəsimi Məmmədli Kamran Mahmudovun təqdimatında yayımlanan “Çətin sual” verilişində bu barədə danışır.