Cinayət törətməyənləri buraxmaq olar-politoloq

Bakı/26.05.21/Turan:  Cinayət törətməmiş, aldadılmış insanları Ermənistana qaytarmaq olar. Politoloq Zərdüşt Əlizadə bunu bu gün, mayın 26-da Turan Agentliyinin “Çətin sual” verilişində bidlirib. 

Məsələnin mahiyyəti budur ki, Ermənistanın iki nümayəndəsi - Georgi Vanyan və Yuri Manvelyanın prezident İlham Əliyevə hüquq-mühafizə orqanları tərəfindən saxlanılan erməni hərbiçilərin azad edilməsi ilə bağlı müraciətinə Azərbaycanın bir neçə vətəndaş cəmiyyəti üzvləri də qoşulub.

Həmin çağırışa qoşulan Arzu Abdullayeva, Əli Abbasov, Zərdüşt Əlizadə, Sabit Bağırov prezidentdə xahişlə müraciət edərək bildirirlər ki, xoş məram nümayiş etdirərək, Azərbaycanda həbsdə olan və istintaqın barələrində hər hansı ciddi cinayət əməli aşkar etmədiyi erməni hərbiçiləri azadlığa buraxmaq olar.

Politoloq deyir ki, Qarabağda saxlanılmış dəstə üzvlərini Azərbaycan “təxribatçı dəstə”, erməni tərəf “hərbi əsirlər” adlandırır. “Hətta Azərbaycan tərəf bu dəstədən cinayət əməlinə yol verməmiş 3-4 nəfəri də azad edib. Hesab edirəm ki, bunu indi də davam etmək olar. Əlbəttə, ilkin olaraq bunu cinayət əməlinə yol verməmiş erməni hərbiçilərinə şamil etmək olar.   

Bu müraciətin səbəbi barədə danışan Zərdüşt Əlizadə vurğulayır ki, son 33 ildə Ermənistan və Azərbaycan xalqları zorla onlara sırıdılmış siyasi xəttin qurbanlarıdır: “İki qonşu dövlət arasında sülh və ya müharibənin olmasına onlar qərar verməyiblər, bizim xalqların taleyinin müəyyən edilməsində, demək olar ki, onlardan heç bir şey asılı olmayıb”.

Bəzi vieogörüntülərdə Azərbaycan-Ermənistan hərbiçilərinin bir-birinə etikadankənar münasibətinə toxunan politoloq deyir ki, belə əməllərə yol vermək olmaz, bu, sülh məsələsinə hər hansı töhfə verən əməllər deyil.

Yəni regionda prosesin normal duruma çatması üçün tərəflər bir-birinə daha çox sülh mesajları ötürməlidirlər: “Fikrimcə, indi belə mesajlara daha çox ehtiyac yaranıb. Ona görə də bu xətti gücləndirmək lazımdır”. -05B-