Ekspert 2019-cu ildə siyasi proseslərin inkişafı haqqında

Bakı/04.01.19/Turan: Azərbaycanda hakimiyyət və müxalifət arasında normal qarşılıqlı münasibətlər yoxdur, bu barədə Turan agentliyinin "Çətin Sual" proqramına müsahibəsində Sivil Toplum Platformasının siyasi eksperti Nəsimi Məmmədli bildirib

2002-ci il konstitusiya referendumu nəticəsində qanunvericiliyə partiyaların siyasi həyatda iştirakını məhdudlaşdırılan bir sıra düzəlişlər edilib.

Digər tərəfdən, ölkədə siyasi plüralizm yoxdur və partiyaların öz baxışlarını və proqramlarını əhaliyə çatdırmaq imkanları məhduddur.

" Harada seçki yoxdursa, orada iqtidar müxalifətindən yox, daha doğrusu rejim müxalifətindən danışmaq lazımdır. Rejim müxalifəti isə heç bir halda iqtidarla dialoq aparacaq bir durumda olmur. Nə iqtidar bunda maraqlı olur, nə də müxalifətin özü buna meyl edir. Çünki, qeyd etdiyim kimi, o, münasibətlər sistemi nə qanunvericiliyə, nə də ölkədəki münasibətlər sisteminə əsaslanır. Faktiki olaraq, Azərbaycanda normal iqtidar-müxalifət münasibətlərindən danışmaq mümkün deyil. O baxımdan hansısa dialoq mühitindən, hansısa bir uzlaşmadan, müsbət tendensiyadan danışa bilmərik", deyə Məmmədli bildirib.

2019-cu il üçün proqnoza gəlincə, onun fikrincə, gərginlik davam edəcək.

"Qeyri-azad ölkələrin hamısının sonda aqibəti eyni olsa da oradakı siyasi proseslərin dinamikası haqqında, siyasi proseslərin gələcəyi haqqında danışmaq çox çətindir", deyə Məmmədli bildirib.

O, 2019-cu ildə növbədənkənar parlament seçkiləri ehtimalını istisna etməyib. 2016-cı ildə konstitusiyaya dəyişikliklə bağlı keçirilən referendum Azərbaycan hakimiyyətinə imkian verir ki, növbədənkənar seçki keçirsin.

Ekspert siyasi məhbuslar, ifadə azadlığı və mətbuatla bağlı vəziyyətin yaxşılaşacağını gözləmir. Hökumətin vətəndaş cəmiyyətinə təzyiqi davam edəcək, Məmmədli belə hesab edir.

Məmmədli Azərbaycanın Avropa institutları ilə münasibətlərində də müsbət addımlar gözləmir. "Çox güman ki, 2019-cu il itirilmiş fürsətlər ili olacaq", deyə ekspert fikrini tamamlayıb. -06D-