Ekspert: “Fakt budur ki, Azərbaycan ərazisinə raket atlıb”

Bakı/03.04.21/Turan: İknici Qarabağ mübaribəsi zamanı Ermənistandan Azərbaycana raket atılmasının indi üzə çıxmasının bir neçə səbəbi ola bilər. Bu barədə Turan-ın “Çətin sual” proqramının 2021-ci il aprelin 2-də “Şuşaya atılmış İsgəndər raketinin qalıqları” mövzusuna dair buraxılışında təhlükəsizlik məsələləri üzrə ekspert İlham İsmayıl bildirib.

İlham İsmayıl deyir ki, ortada bir neçə yalan var: “Yalanın biri budur ki, Rusiya Ermənistana “İsgəndər-M” silahı satıb, amma bunu təsdiq etməyib. Digər bir yalan budur ki, erməni tərəf bu raketləri alsa da, bunu bildirməyib. Daha bir yalan budur ki, bu raketi Azərbaycana erməni tərəf atıbsa ruslar səslərini çıxarmayıb, əksinə, ruslar atıbsa, ermənilər. Amma fakt olan budur ki, Azərbaycana Ermənistan tərəfindən raket atılıb. “Bunu kim atıb” məsələsini müəyyən etmək lazım gəlir”.

İlham İsmayıl “Forbes” jurnalına istinadən deyib ki, erməni tərəf müharibənin gedişini dəyişdirmək məqsədilə İkinci Qarabağ müharibəsi dövründə Azərbaycan ərazisinə bir neçə raket atıb. Onun sözlərinə görə, Rusiya bu raketləri Ermənistana satmayıb, 2016-cı ilin aprelində baş vermiş lokal toqquşmadan sonra sadəcə hədiyyə verib. Çünki Ermənistanın belə bahalı silah almağa vəsaiti yoxdur. Özü də bu silah Ermənistandan başqa heç bir ölkəyə verilməyib.           

Ekspertə görə, indi bu məsələ barəsində danışılması Rusiya ilə Azərbaycan arasında hansısa incikliklərdən xəbər verir. Ekspertə görə, 2020-ci il noyabrın 11-dən Rusiya sülhməramlıları Azərbaycan ərazisinə gəlib və həmin vaxtdan bu yana Azərbaycanın maraqları naminə hansısa bir müsbət addım atılmayıb.

Ermənilər keçmiş Dağlıq Qarabağ ərazisinə qaytarılır, amma azərbaycanlılar öz dədə-baba yurdlarına qaytarılmırlar. İlham İsmayıla görə, bu məsələnin, yəqin ki, hələ bilinməyən tərəfləri də var.

2016-cı il aprelin 4-5-dəki döyüşlərlə bağlı açıqlama verən ekspert deyir ki, həmin döyüşlərlə Azərbaycan Qarabağın azadlığı məsələsində güzəştə getməyəcəyini nümayiş etdirib: “2020-ci il sentyabrın 27-dən noyabrın 9-na kimi davam etmiş İkinci Qarabağ müharibəsində isə 30 ilə yaxın işğal altında olan torpaqlar azad edildi”. -05B-