Əli Əliyevin həbsi, jurnalistin cərimələnməsi, Tofiq Yaqublunun şikayətindən imtina- Rüfət Səfərov “Çətin sual" qarşısında

Bakı/14.01.22/Turan: Yanvarın 13-də Yasamal Rayon Məhkəməsində Vətəndaş və İnkişaf Partiyasının (VİP) sədri Əli Əliyevə hökm oxunub. Partiya sədri Cinayət Məcəlləsinin 147.1 (böhtan) maddəsilə 5 ay azadlıqdan məhrum edilib. Əli Əliyev noyabrın 30-da Xızıda – Qaraheybət poliqonunda qəzaya uğramış helikopterdən sağ çıxan Dövlət Sərhəd Xidmətinin Xüsusi Hava Əməliyyatları Qüvvələri qərargahının taktiki hazırlıq və hava atəşi üzrə baş zabiti, polkovnik Emil Cəfərovun şikayəti əsasında cəzalandırılıb.

Prokurorluq Milli Şuranın Koordinasiya Mərkəzinin və Müsavat Partiyasının üzvü Tofiq Yaqublunun sosial mediada yayılan görüntülərində işgəncə əlamətlərinin olmadığı nəticəsinə gəlib. Tofiq Yaqublu bildirib ki, Səbail Rayon Prokurorluğu onun işgəncəyə məruz qalmasıyla bağlı şikayəti üzrə cinayət işi başlamaqdan imtina edib.

“Jamaz.info” saytının redaktoru Fikrət Fərəməzoğlu 500 manat cərimələnib. Sabunçu Rayon Məhkəməsi yanvarın 12-də onun haqqında qərar çıxarıb. F.Fərəməzoğlunun sözlərinə görə, yanvarın 11-də “jamaz.info” saytında yayımlanan “Xankəndidən Şuşa şəhəri atəşə tutuldu” başlıqlı yazıya görə onu Respublika Prokurorluğuna çağırıblar. Bundan sonra məhkəmə qərarı ilə jurnalist cərimələnib.

Bütün bunlar barəsində Müdafiə xətti hüquq müdafiə təşkilatının həmtəsisçisi Rüfət Səfərov Kamran Mahmudovun təqdimatında yayımlanan “Çətin sual” verilişində danışır.