Hakimiyyət Tofiq Yaqubludan qisas alır? – Seymur Həzi Çətin sual qarşısında

Bakı/09.01.23/Turan: Milli Şuranın və Müsavat Partiyasının üzvü Tofiq Yaqublunun yanvarın 5-də başladığı aclıq aksiyasl genişlənməkdədir. Aksiyaya daha iki nəfər qoşulub.Yanvarın 7-də Tofiq Yaqublunun həyat yoldaşı Maya Yaqublu aclığa başladığını bildirib.

Maya Yaqublu yanvarın 8-də Amerikanın Səsinə bildirib ki, Tofiq Yaqubluya dəstək məqsədi ilə dünən Azərbaycan Xalq Cəbhəsi Partiyasının (AXCP) təşkilat şöbəsinin əməkdaşı Seymur Əhmədsoy və AXCP fəalı Elnur Quliyev onların yaşadığı evə gələrək aclıq aksiyasına qoşulub.

“Aclıq aksiyasına qoşulmaq üçün çoxsaylı insanlar müraciət edib. Onlar Müsavat Partiyasının qərargahında aclığa başlayacaqlarını bildirib. Həmçinin ölkənin regionlarından da fəallar aclıq aksiyasına qoşulacağını bildirib”, Maya YaqubluTurana  deyib.

Milli Şuranın və Müsavat Partiyasının üzvü Tofiq Yaqublu yanvarın 5-dən aclıq etdiyni bildirib. Tofiq Yaqublu dekabrın 23-də Bakının mərkəzində ictimai fəal Bəxtiyar Hacıyevin azadlığa buraxılması tələbi ilə keçirilən etiraz aksiyasında saxlanıb.Həmin gün Səbail Rayon Məhkəməsi hakim Mədinə Bağırovanın sədrliyi ilə Tofiq Yaqublunu İnizbati Xətalar Məcəlləsinin 535.1 (polisin qanuni tələbinə tabe olmamaq) və 510-cu (xırda xuliqanlıq) maddələri ilə təqsirli bilərək 30 sutka inzibati həbsə məhkum edib.

Bütün bunlar barəsində Tofiq Yaqublunun ailə üzvü, Azərbaycan Xalq Cəbhəsi  Partiyasının sədr müavini Seymur Həzi Kamran Mahmudovun təqdimatında yayımlanan “Çətin sual” verilişində danışır.