Jurnalist Aytən Məmmədovaya hücum edən şəxs tapılacaqmı? – Mehman Əliyev “Çətin sual` qarşısında

Bakı/10.05.22/Turan: Jurnalist Aytən Məmmədovanı bıçaqla təhdid edən şəxs hələ ki tapılmayıb. Aytən Məmmədovaya mayın 8-də, Bakı vaxtı ilə saat 23:45 radələrində yaşadığı binanın blokunda hücum edilib. Onun arxasınca liftə girən bir nəfər boğazına bıçaq dirəyib və adını çəkmədiyi məhkəmə işinə görə hədələyib, yazmamasını tələb edib, jurnalisti övladı ilə təhdid edib.

Jurnalist bildirib ki, ona hücum peşə fəaliyyəti ilə bağlıdır. Aytən Məmmədova Nərmin işində günahlandırılan İlkin Süleymanovun məhkəmə proseslərini işıqlandırırdı.

Jurnalist Aytən Məmmədovaya edilən hücumla bağlı CM-in 134-cü maddəsi (qətl və ya sağlamlığa ağır ziyan vurulması təhlükəsi) ilə cinayət işi başlanıb.

ABŞ səfirliyi, Sərhədsiz Reportyorlar təşkilatı, ATƏT-in media azadlığı üzrə nümayəndəsi Tereza Ribeyro, AŞPA-nın Monitorinq Komitəsinin Azərbaycan üzrə məruzəçisi Ştefan Şennak jurnalist Aytən Məmmədovaya edilən silahlı hücumu pisləyiblər. Bir qrup jurnalist və vətəndaş cəmiyyətinin üzvləri  jurnalist Aytən Məmmədovaya hücum edən şəxsin və bu sifarişin arxasında duranların tez bir zamanda tapılıb, cəzalandırılması üçün Prezident İlham Əliyevə və güc strukturlarının rəhbərlərinə açıq müraciət ünvanlayıblar.

Jurnalistə hücum edən şəxs tapılacaqmı?

Turan İnformasiya Agentliyinin direktoru Mehman Əliyev Kamran Mahmudovun təqdimatında yayımlanan “Çətin sual” verilişində bu haqda danışır.