Priqojinin ölümü, Qarabağda baş verənlər, “Lavrovun təklifləri” – Rauf Mirqədirov Çətin sualda

Bakı/24.08.23/Turan: Rusiyada Tver vilayətinin Boloqovsk rayonunda Embraer Legacy tipli təyyarə qəzaya uğrayıb. Baza teleqram kanalının məlumatına görə qəzaya uğramış Embraer ERG 135 və bort nömrəsi RA-02795 olan təyyarə Vaqner özəl hərbi şirkətinin qurucusu Yevgeni Priqojinə məxsusdur. Kanal xəbər verir ki, təyyarə Moskvadan Sankt Peterburqa uçurdu. Təyyarədə 3 nəfər heyət üzvü də daxil 10 nəfər olub. İlkin məlumata görə onların hamısı həlak olub.  Rusiyanın TASS dövlət xəbər agentliyi Rosaviasiya dövlət qurumuna istinadla sərnişinlərin siyahısında Yevgeni Priqojinin olduğunu bildirir.

Qarabağ ətrafında siyasi gərginlik, eləcə də Ermənistan və Azərbaycan rəsmilərinin söz atışmalaraı davam edir.

Avqustun 17-də Ermənistan mediası Rusiyanın xarici işlər naziri “Lavrovun Qarabağ təklifləri” olduğu iddia edilən sənəd yayıblar.  AzadlıqRadiosunun Erməni xidməti – Azatutyun yazıb ki, bu sənədi Qarabağdakı separatçı rejimin “rəsmisi” kimi təqdim olunan Tiqran Petrosyan ictimailəşdirib.Qarabağa aid təkliflərdən ibarət olan sənəddə 25 iyul tarixi göstərilib. Məhz həmin gün Moskvada Lavrov Azərbaycan və Ermənistanın xarici işlər nazirləri ilə görüşmüş və daha sonra üçtərəfli görüş keçirilmişdi.Tiqran Petrosyan tərəfindən dərc olunmuş və Lavrova aid edilən sənəd “Azərbaycan SSR-in tərkibindəki keçmiş Dağlıq Qarabağ Muxtar Vilayətinin ərazisindəki erməni əhalinin təhlükəsizlik və hüququnun Azərbaycan Respublikasının qanunvericiliyinə uyğun olaraq təmin edilməsinin baza prinsipləri və parametrləri” adlanır. Sənəd 14 bənddən ibarətdir.

Bütün bunlarla bağlı siyasi şərhçi Rauf Mirqədirov Kamran Mahmudovun təqdimatında yayımlanan “Çətin sual” verilişində danışır.