Qeydiyyat problemi. Hökumət Bakıya axının qarşısını cərimələrlə almağa çalışır? – Hafiz Həsənov saat 16:00-da Çətin sual qarşısında

Bakı/25.01.23/Turan: Son günlər sosial şəbəkələrdə "Yaşayış yeri və olduğu yer üzrə qeydiyyat haqqında" Qanunun icrası diqqət mərkəzinə gəlib. Daxili İşlər Nazirliyi (DİN)-dən verilən məlumata görə, yaşayış yerindən kənarda 60 gündən artıq qalmaq istəyən vətəndaş həmin yerə gəldikdən sonra 7 iş günü ərzində polisə məlumat verməlidir. Əks halda, inzibati məsuliyyətə cəlb olunaraq xəbərdarlıq ediləcək və 30 manat cərimələnəcək.

Yeri gəlmişkən, ötən ilin sonunda yerli mediada Bakıda DİN-in reyd keçirməsi ilə bağlı xəbər yayılıb. Məlumata görə, rayon polis əməkdaşları sakinlərin yaşayış qeydiyyatını yoxlayıb və yaşadığı ünvanda qeydiyyatda olmayanlara xəbərdarlıq olunub.

Bundan sonra həm sosial şəbəkələrdə, həm də mediada "Yaşayış yeri üzrə qeydiyyatda olmayanlar cərimə olunacaq" kimi yazılara rast gəlirik.

DİN yanvarın 17-də yaydığı açıqlamasında yaşayış yeri üzrə qeydiyyatı zəruri edən səbəblər kimi hərbi səfərbərlik, sosial müavinət, evlənmə, boşanma və digər məsələlərlə əlaqədar müraciətlərə baxılarkən vətəndaşı tapmaqda çətinlikləri göstərir.

Ekspertlər bu qərarın Konstutusiyaya və sərbəst hərəkət azadlığına zidd olduğunu bildirirlər. Bu məsələnin məhz indi gündəmə gəlməsi də maraq doğurur. Hökumət niyə məhz indi belə bir addım atmağa qərar verib? Ola bilərmi, əhalinin yerdəyişməsini nəzarət altına almaq, vətəndaşları nəzarətdə saxlamağa qanuni əsaslar yaratmaq üçün bu addımı atmaq qərarı versin? Daha bir versiya isə odur ki, burada bir məqsəd də rayonlardan Bakıya axının qarşısını almaqdır. Yeri gəlmişkən, bu qərar sovet dönəmlərindəki məhdudiyyətləri də xatırladır.

Hüquq və İnkişaf Mərkəzi İctimai Birliyinin sədri Hafiz Həsənov Kamran Mahmudovun təqdimatında yayımlanan “Çətin sual” verilişində bu barədə danışır.