Rusiya- Ukrayna Müharibəsi 8-ci gün. Azərbaycana qarşı da sanksiya təklifi? – Rauf Mirqədirov “Çətin sual" qarşısında

Bakı/03.03.22/Turan: Rusiyanın Ukraynaya təcavüzünün 8-ci günündəyik. Ukraynada gərginlik hələ də davam edir. 

Rusiya prezidenti Vladimir Putin Haaqa Tribunalına verilir. Dünyanın 38 ölkəsi Rusiyanın Ukraynaya təcavüzü ilə bağlı Beynəlxalq Cinayət Məhkəməsinə müraciəti edib. Bu barədə Böyük Britaniyanın Baş naziri Boris Conson açıqlama verib.

Putin KTMT-nin sülhməramlı fəaliyyəti haqqında sazişə "əlaqələndirici dövlət" anlayışının tətbiqi ilə bağlı düzəlişləri ratifikasiya üçün Dövlət Dumasına təqdim edib. Belə bir iddiala var ki, bu addımı ilə Putin KTMT ölkələrini də Ukrayna ilə qanlı müharibəyə cəlb etməyə çalışır.

Bəzi media orqanlarında yayılan məlumata görə, İngiltərə parlamentində  Rusiya ilə əməkdaşlıq edən Azərbaycana və digər ölkələrə qarşı da sanksiyalar tətbiq edilməsi ilə bağlı təklif səsləndirilib.

Belə fikirlər var ki, sanksiyalar Rusiyanın iqtisadi, siyasi cəhətcə gücdən düşməsinə və onun Qarabağ mövzusunda, Azərbaycan-Ermənistan mövzusunda əvvəlki mövqeyinin yumşalmasına gətirib çıxara bilər.

Yeri gəlmişkən, Ermənistanın Baş naziri Nikol Paşinyan bəyan edib ki, “gündəlikdə regional kommunikasiyaların açılması, Ermənistan-Azərbaycan sərhədinin demarkasiyası, həmçinin Ermənistan və Azərbaycan arasında sülh müqaviləsinin imzalanması məsələləri var.”

Bütün bu məsələlərlə bağlı siyasi şərhçi Rauf Mirqədirov Kamran Mahmudovun təqdimatında yayımlanan “Çətin sual” verilişində fikir bildirir.