Söyüdlüdə vəziyyət, Bakıda Söyüdlüyə dəstək aksiyası, Avropa Şurasının məhbus hesabatı, Polis gününə sözardı... – Rüfət Səfərov Çətin sualda

Bakı/03.07.23/Turan: Gədəbəy rayonunun Söyüdlü kəndində iyunun 20-si və 21-də baş verən etirazlardan sonra bu kəndin girişinə qoyulan polis postunun hələ də götürülmədiyi deyilir.

"Polislər yalnız kənd sakinlərini kəndə buraxır. Sənədlrərimiz yoxlandıqdan sonra kəndə daxil ola bilirik", deyə adının çəkilməsini istəməyən kənd sakini Turan-a bildirib.

Onun sözlərinə görə, kəndin içində polis yoxdur və son günlər yeni həbslər olmayıb.

"Əvvəlki günlərdə həbs edilən on nəfərdən isə heç kim hələ azadlığa buraxılmayıb", deyə o qeyd edib.

İyulun 2-si Bakıda bir qrup adam aksiya keçirib. Onlar bildiriblər ki, Gədəbəyin Söyüdlü kəndində polisin sakinlərə etdiyi zorakılıq və həbslərə etiraz edirlər. Paytaxın Fəvvarələr meydanında keçirilən bu aksiyaya polis müdaxiləsi olmayıb. Etirazı xaricdə yaşayan azərbaycanlı fəalların təşkil etdiyi iddia olunur. Daxili İşlər Nazirliyinin mətbuat xidmətinin şöbə rəisi Elşad Hacıyev özünün facebook səhifəsində yazıb ki, təyin edilsə də sözügedən aksiya heç kim tərəfindən dəstəklənməyib.

"Azərbaycanda son 20 ildə cinayətlərin orta hesabla 87 faizinin açılması təmin olunub."

Bu barədə Azərbaycan Daxili işlər naziri general-polkovnik Vilayət Eyvazov “Polis Günü”nə və 2022-2023-cü tədris ilinin buraxılışına həsr olunmuş təntənəli mərasimdə çıxışı zamanı deyib.

Azərbaycan AŞ-da məhbus sayına görə üçüncü yerdədir. Avropa Şurasının “Prison Populations 2022” hesabatında belə deyilir. Həmin hesabat Lozanna Universiteti  tərəfindən hazırlanıb.

Bütün bunlar barədə hüquq müdafiəçisi, “Müdafiə Xətti” hüquq müdafiə təşkilatının rəhbəri Rüfət Səfərov Kamran Mahmudovun təqdimatında yayımlanan “Çətin sual” verilişində danışır.