`Tərtər işi`: 19 nəfər azadlığa buraxıldı, 2 mərhum hərbçi bəraət aldı. Ədalət bərpa olunur? – Nasir Əliyev və Sahib KərimliÇətin sual qarşısında

Bakı/06.12.22/Turan: Baş Prokurorluğun  bu gün yaydığı məlumatda qeyd olunub ki, əvvəllər istintaqı aparılmaqla məhkəməyə göndərilmiş 3 cinayət işi üzrə dövlətə xəyanət və digər maddələrlə təqsirli bilinərək məhkum olunmuş ümumilikdə 19 şəxs barəsində olan məhkəmə qərarlarına Ali Məhkəmənin Plenumunda yenidən baxılıb və qərarlar ləğv edilərək müvafiq məhkəmələrə qaytarılıb. Öz növbəsində məhkəmələr də həmin işlər üzrə qərarları ləğv edərək ibtidai araşdırmaya prosessual rəhbərliyi həyata keçirən prokurora qaytarıb. Qeyd olunub ki, əlavə istintaq zamanı həmin şəxslərin dövlətə xəyanət ittihamı üzrə təqsirli olmaları sübuta yetirilməyib: "Nəticədə cinayət təqibinə bəraətverici əsaslarla (Cinayət-Prosessual Məcəllənin 39.2-ci maddəsi), o cümlədən onlardan 10 şəxs barəsində digər epizodlar (hərbi xidmət əleyhinə olan cinayətlər və s.) üzrə olan cinayət təqibinə isə bəraətverici olmayan əsaslarla xitam verilməsi haqqında qərarlar qəbul edilib və barələrində seçilmiş həbs qətimkan tədbiri ləğv edilməklə azadlığa buraxılıblar".

İstintaq zamanı həmçinin Hüseynov Mehman  və Ağazadə Elxanın təqsirləri sübuta yetirilmədiyindən barələrindəki cinayət təqibinə bəraətverici əsaslarla (Cinayət-Prosessual Məcəlləsinin 39.2-ci maddəsi) xitam verilməsi haqqında qərarlar qəbul edilib.

Oğlu Emil Əliyev bu gün azadlığa çıxan hüquq müdafiəçisi, Repressiya və İşgəncələrə qarşı Komitənin üzvü Nasir Əliyev və “Tərtər işi”ni daim gündəmdə saxlayanlardan biri - siyasətçi Sahib Kərimli Kamran Mahmudovun təqdimatında yayımlanan “Çətin sual” verilişində baş verənlərlə bağlı danışır.