“Tərtər işi” üzrə təqsirləndirilənlərin sayı artır. Bəs kimlər hələ kənarda qalıb? – Validə Əhmədova Çətin sualda

Bakı/20.04.23/Turan: Sumqayıt Məhkəmə Kompleksində “Tərtər işi”ndəki işgəncələrə görə bir qrup hərbi qulluqçunun məhkəməsi davam edir. Bu iş Bakı Hərbi Məhkəməsinin icraatında olsa da, Sumqayıt Məhkəmə Kompleksində keçirilir.

“Tərtər işi” üzrə ittiham olunan daha 4 nəfərin - Ruslan Mikayılov, Sənan Maşıyev, Cabir Qəhrəmanov və Elçin Əliyevin cinayət işi üzrə ibtidai istintaq başa çatıb. İş üzrə toplanmış materiallar baxılması üçün məhkəməyə göndəriləcək.

192 nəfər hərbçinin zərərçəkmiş qismində tanındığı cinayət işi üzrə hazırda təqsirləndirilən şəxslərin ümumi sayı 11 nəfərdir.

2021-ci ilin dekabr ayında Baş Prokurorluqda “Tərtər işi” ilə bağlı cinayət işlərinin icraatının təzələnməsi ilə bağlı qərarlar qəbul edilib. Qərarlardan sonra aparılan istintaq zamanı ayrı-ayrı hərbi qulluqçulara işgəncə verilməsi, onların qanunsuz azadlıqdan məhrum edilməsi və vəzifə səlahiyyətlərini aşılmasına əsaslı şübhələr müəyyən edilib. Hələlik  11 nəfər təqsirləndirilən qismində cinayət məsuliyyətinə cəlb olunub.

Bu say artacaqmı? Hələlik kimlər kənarda qalıb?

Tərtər hadisələri zamanı işgəncə nəticəsində öldürülən Elçin Quliyevin anası Validə Əhmədova Kamran Mahmudovun təqdimatında yayımlanan “Çətin sual” verilişində bu barədə danışır.