Ukraynalılar Soledar və Baxmutu saxlayacaqlarmı? - Hərbi analitik Oleksandr Musiyenko ilə "Çətin Sual" da söhbət

Ötən gün Rusiya Müdafiə Nazirliyi gözlənilmədən Ukraynadakı Rusiya ordusunun komandanının dəyişdiyini bildirdi - Sergey Surovikinin yerini Baş Qərargah rəisi Valeri Gerasimov tutdu.

Rusiya Müdafiə Nazirliyinin məlumatında ​​bu "rokirovka" "xüsusi hərbi əməliyyata rəhbərlik səviyyəsinin yüksəldilməsi" və "onun həyata keçirilməsi zamanı həll olunan vəzifələrin miqyasının genişlənməsi, silahlı qüvvələrin növləri arasında qarşılıqlı əlaqənin daha yaxından təşkil edilməsi zərurəti" ilə izah edilib.

Lakin komandan dəyişikliyinin Rusiyanın uğur qazanmasına imkan verəcəyi şübhə doğurur. Ukraynada Rusiya ordusunun komandanlığında kadr dəyişikliyi daha çox çıxış yolu axtarmağa məqsədsiz can atmağa bənzəyir.

Hərbi analitik Oleksandr Musienko “Çətin sual” verilişində Ukrayna cəbhəsində baş verənləri şərh edir.

Onun sözlərinə görə, indi Soledarı və Baxmutu saxlamaq və bu istiqamətdə Rusiya Silahlı Qüvvələrini məğlub etmək üçün hər şey edilir.

“Ukrayna Silahlı Qüvvələrinin vəzifəsi onları əzmək, zəiflətmək, onları dar cəbhədə, məhz bu ərazilərdə mümkün qədər çox səy göstərməyə məcbur etməkdir”, - ekspert deyib.

Musienko xatırladıb ki, Baxmuta qarşı uğursuz hücum bir neçə aydır ki, davam edir.

“İndi onlar Soledara keçdilər. Çünki onlar Ukrayna Silahlı Qüvvələrinin müdafiəsində boşluq axtarırlar və cəbhə xəttini yarıb keçə biləcəkləri zəif yer tapmağa çalışırlar. Soledar Baxmutdan bir neçə on kilometr şimalda və eyni müdafiə xəttində yerləşir.

Rus qoşunları bu yaşayış məntəqələrinə davamlı hücumlar edərək, Ukraynanın müdafiəsini yarmağa çalışır. Amma indiyə qədər bacarmayıblar. Soledarda döyüşlər davam edir və ora əlavə qüvvələr göndərilir”, - o deyib.

Lakin ekspertin fikrincə, rusların hesablamalarının əksinə, Baxmut və Soledar çöksə belə, cəbhə dağılmayacaq.

“Aydın olmaq üçün bir misal çəkim. Ötən ilin may-iyun aylarında Ukraynanın şərqində Donetsk və Luqansk vilayətlərində şiddətli döyüşlər getdi. O zaman ruslar daha çox resurs, artilleriya və ağır silahlarla hücuma keçdilər.

Yəni, yollarının üstündə mümkün olan hər şeyi artilleriya ilə darmadağın etdilər. O zaman Severodonetsk və Lisiçansk uğrunda ağır döyüşlər getdi. Rusiya Silahlı Qüvvələrinin bütün Donetsk vilayətini yarması və ələ keçirməsi, hətta Dnepr və Zaporojyenin yarılması təhlükəsi vardı.

Lakin Ukrayna Silahlı Qüvvələrin komandanlığının məharətli və bacarıqlı hərəkətləri sayəsində Rusiya Silahlı Qüvvələrini o qədər zəiflətmək mümkün oldu ki, Lisiçanskini tutduqdan sonra onlar dayanmağa məcbur oldular. Onlar hücumu davam etdirmədilər. Üstəlik, Ukrayna Silahlı Qüvvələri Beloqorovkanı onlardan geri ala bildi”, - Musienko izah edib və əlavə edib ki, ən xoşagəlməz ssenari ehtimal edilsə belə, Rusiya strateji baxımdan qalib gəlməyəcək.

“Ukrayna qoşunları başqa hüdudlara çəkiləcək və cəbhə xəttini saxlamağa davam edəcək", - ekspert deyir.--0--