Naxçıvanda Vasif Talıbovun yaxınları və maliyyə naziri, komitə sədri vəzifədən uzaqlaşdırılır. Növbə kimdədir? – Həkimeldostu Mehdiyev Çətin sual qarşısında

Bakı/12.01.23/Turan: Naxçıvan Muxtar Respublikasının maliyyə naziri Rafael Əliyev vəzifəsindən azad edilib. Bununla bağlı Naxçıvan Muxtar Respublikası Ali Məclisi Sədrinin birinci müavini Azər Zeynalov yanvarın 11-də sərəncam imzalayıb. Qeyd edək ki, 2022-ci il noyabrın 26-da Səbail rayon məhkəməsinin qərarı ilə Rafael Əliyev barəsində 4 ay müddətinə həbs qətimkan tədbiri seçilib. Rafael Əliyev vəzifə səlahiyyətlərindən sui-istifadə edərək müxtəlif yollarla “xüsusilə külli miqdar” təşkil edən 144 milyon manat dövlət vəsaitini mənimsəməkdə ittiham edilir.

Naxçıvan Muxtar Respublikası Ali Məclisi Sədrinin birinci müavini Azər Zeynalovun daha bir sərəncamına görə, Hicran Rüstəmov Naxçıvan Muxtar Respublikası Dövlət Şəhərsalma və Arxitektura Komitəsinin sədri vəzifəsindən azad edilib.

Eyni zamanda Naxçıvan Muxtar Respublikası Ali Məclisinin sədri postundan kənarlaşdırılan Vasif Talıbovun yaxınları da tutduğu yüksək postlardan uzaqlaşdırılır.

“Naxçıvan Bank” ASC-nin Müşahidə Şurası (MŞ) yenidən formalaşdırılıb. Məlumata görə, indiyə qədər Müşahidə Şurasına sədrlik edən Əsədulla İsgəndərov vəzifəsindən azad edilib, onun yerinə Binnət Novruzov təyin olunub. Bundan başqa, indiyə qədər Şuranın üzvləri olan Naxçıvan MR Ali Məclisinin keçmiş sədri Vasif Talıbovun qızı Baharxanım Talıbova  və Rifat Mahmudov da vəzifələrindən azad ediliblər.

Vasif Talıbovun qaynanası  “Naxçıvanın Vətəndaşlıq vəziyyəti aktlarının qeydiyyatı şöbəsinin  rəhbəri Sənubər Soltanova da işindən uzaqlaşdırılıb.

Yerli medianın yazdığına görə, Vasif Talıbovun və oğlu Seymur Talıbovun biznesi və əmlakları əl dəyişir.

Bütün bunlar barədə Naxçıvanda yaşayan jurnalist Həkimeldostu Mehdiyev Kamran Mahmudovun təqdimatında yayımlanan “Çətin sual” verilişində danışır.