ABŞ 2022-ci ilin aprelindən bəri ilk dəfə Rusiya neftini idxal edib

РБК: ABŞ-ın xarici ticarət statistikası məlumat bazasına görə, 2023-cü ilin noyabrında ABŞ 749,5 min dollar dəyərində Rusiya mənşəli xam neft idxal edib. Bu, 2022-ci ilin aprelindən bəri ilk dəfə baş verib. İdxalın həcmi 9,86 min barel təşkil edib.

Birləşmiş Ştatlar 2022-ci ilin martında Ukraynadakı hərbi əməliyyatlara görə sanksiyalar çərçivəsində Rusiyadan neft, qaz və digər enerji idxalına qadağa qoyub. Bununla belə, belə idxal ABŞ Maliyyə Nazirliyinin Xarici Aktivlərə Nəzarət Ofisinin (OFAC) ayrıca lisenziyaları əsasında mümkündür.

2022-ci ildə ABŞ və digər G7 ölkələri, həmçinin Aİ, İsveçrə və Avstraliya Rusiyanın gəlirlərini azaltmaq məqsədilə Rusiya neftinə qiymət tavanı tətbiq ediblər. Bu ölkələrin şirkətlərinə Rusiya nefti müəyyən edilmiş barel üçün 60 dollardan yuxarı qiymətə satılarsa, onun üçün nəqliyyat, sığorta və maliyyə xidmətləri göstərməsi qadağandır. Neft məhsulları üzrə tavan onların növündən asılı olaraq müəyyən edilir: dizel üçün 100 dollar, mazut üçün isə 45 dollar.

Moskva sanksiyaları qeyri-qanuni hesab edir və buna cavab olaraq neftini qiymət tavanına qoşulan ölkələrə verməkdən imtina edib. Baş nazirin müavini Aleksandr Novak qiymət limitinin tətbiqini səmərəsiz alət adlandıraraq, bundan son istehlakçıların əziyyət çəkdiyini bildirib.

ABŞ Energetika Nazirliyinin proqnozuna görə, yaxın iki ildə qlobal neft istehlakının artımı 2023-cü ilə nisbətən aşağı olacaq: 1,9 milyon barelə qarşı müvafiq olaraq gündə 1,4 milyon barel (1,4%) və 1,2 mln barel (1,2%). Nazirlik 2024-cü ildə “Brent” markalı neftin orta qiymətinin əvvəlki ilə təxminən eyni - 82 dollar/barel olacağını, 2025-ci ildə isə 79 dollara düşəcəyini gözləyir.