Hakerlər "Armenpress" dövlət agentliyinin saytını sındırıb İlham Əliyevin çıxışını yerləşdiriblər

Bakı/14.03.21/Turan: Hakerlər Ermənistanın "Armenpress" Dövlət İnformasiya Agentliyinin saytını sındırıblar. Bir saatdan artıq saytın əsas səhifəsində Azərbaycan lideri İlham Əliyevin "Qarabağ Azərbaycandır" sözləri əks olunmuş çıxışının videoyazısı yer alıb.

“Sputnik Armeniya” agentliyi bildirir ki, son vaxtlar Azərbaycan və Türkiyədən erməni xəbər saytlarına kiberhücumlar artıb. Qarabağda müharibə zamanı erməni istifadəçilərə hücum və onların akkauntlarının  Whatsapp əlavələrinin "mənimsənilməsi" cəhdləri artıb.

2020-ci il Ermənistan üçün informasiya təhlükəsizliyi baxımından ən çətin il olub. Media eksperti Samvel Martirosyanın məlumatına görə, kiberhücumlar nəticəsində Xarici İşlər Nazirliyi, Müdafiə Mazirliyi kimi qurumlar da daxil olmaqla, məxfi məlumatların böyük sızması qeydə alınıb.

O qeyd edir ki, Ermənistana genişmiqyaslı kiberhücumların təşkilinə yardmçı qüvvələr – türk haker qrupları, həmçinin muzdlu haker təşkilatları cəlb edilib.—0—