Moldova prezidenti Rusiya qoşunlarının Dnestryanıdan çıxarılmasını tələb edib

Kiyev/18.05.22/UNIAN: Moldova prezidenti Mayya Sandu Avropa Parlamentində çıxışında Dnestryanıdan Rusiya hərbiçilərinin çıxarılmasını tələb edib.

Moldova prezidenti qeyd edib ki, hazırda ölkənin Ukraynadakı müharibəyə cəlb ediləcəyi ilə bağlı bilavasitə təhlükə yoxdur, xəbəri point.md verib. Bu zaman Sandu Moldovanın neytral ölkə olduğunu xatırladıb.

“Amma sözün əsl mənasında neytral olmaq üçün Rusiya qoşunları bizim ərazilərimizdən çıxarılmalıdır. Çünki onların iştirakı bizim neytral statusumuzu və müstəqilliyimizi pozur”, deyə Sandu bildirib.

O deyib ki, Dnestryanı münaqişəsi Moldova üçün çoxsaylı təhdidlərdən biridir.

Prezident qeyd edib ki, hakimiyyət bu məsələni dinc yolla, Moldovanın suverenliyini və ərazi bütövlüyünü dəstəkləməklə həll etmək niyyətindədir. “Biz müharibə və ya sabitliyin pozulmasını istəmirik”, deyə Sandu bildirib.

Eyni zamanda o qeyd edib ki, Rusiya ölkələrin keçmişdə etdiyi kimi qonşu dövlətə hücum edib və “Ukrayna və bütünlükdə Avropa qitəsinin xalqlarını hədsiz faciəyə sürükləyib”. “Onlar Ukraynanı heç kimin düşmək istəmədiyi vəziyyətə salmaq – daha güclü dövlətin geosiyasi əlavəsinə çevirmək istəyirdilər. Biz hamımız bu zamanların heç vaxt qayıtmayacağına ümid edirdik və belə olacağını gözləyirdik. Amma bu zamanlar geri qayıtdı”, deyə Sandu bildirib.

Sandu həmçinin Moldovanın Ukraynanın suverenliyini və ərazi bütövlüyünü dəstəklədiyini qeyd edib: “Krım Ukraynadır, Donbass Ukraynadır, Kiyev Ukraynadır və həmişə Ukrayna olacaq”. -0-