Qərbli müttəfiqlər Ukraynanın əks hücumunun "sülhə doğru addım atmağa kömək edəcəyinə" ümid edirlər

Vaşinqton/13.06.23/Turan: Bazar ertəsi ABŞ və İtaliyanın yüksək vəzifəli diplomatları sülhə nail ola bilməsi üçün döyüş meydanında Ukraynanı dəstəkləməyə davam etmək qətiyyətlərini ifadə ediblər, xəbəri Turan-ın Vaşinqtondakı müxbiri verib.

"Əks hücumda uğur iki nəticə verəcək: baş tuta biləcək istənilən danışıqlar masasında mövqeyi (Ukraynanın) möhkəmləndirəcək və Putinin, nəhayət ki, diqqətini başlatdığı müharibənin başa çatması haqqında danışıqlara yönəltməsinə gətirib çıxara bilər", deyə ABŞ dövlət katibi Entoni Blinken İtaliyanın xarici işlər naziri Antonio Tacani ilə birgə mətbuat konfransında bildirib.

Vaşinqton "əmindir ki", Ukrayna Rusiyanın işğal etdiyi torpaqları qaytarmağa müvəffəq olacaq, lakin Blinken əlavə edib ki,  əks hücumun hansı istiqamətdə getdiyini demək "çox tezdir".

Blinkenlə razılaşan İtaliyanın xarici işlər naziri Tacani deyib ki, əks hücumun "sülhə doğru addım atmağa" kömək edəcəyinə ümid edir, "çünki biz hamımız sülh istəyirik". "Amma sülh ədalətli sülh olmalıdır. Bu, qanunun aliliyini təsdiq edən və hücumun qurbanı olan insanlara azadlıq bəxş edən sülh olmalıdır", deyə o qeyd edib.

"Biz Ukraynaya kömək edirik, çünki sülh istəyirik. Çünki biz Ukraynaya kömək etməsəydik, Ukrayna ilhaqa məruz qalardı və Avropa, Gürcüstan, Moldova və bir çox digər ölkələr üçün daha böyük təhlükə yaranardı. Buna görə biz azadlığı və demokratiyanı müdafiə etmək üçün bunu edirik", deyə İtaliyanın XİN başçısı əlavə edib.  

Onun fikrincə, "bu əks hücum rusları Ukraynadan geri çəkilməyə vadar etməyə kömək etsə, bu, Ukraynaya azadlığı qaytaracaq".

Aleks Raufoğlu