Samvel Babayan Ermənistanın Müdafiə Nazirliyini fərasətsizlikdə ittiham edib

Qarabağ qüvvələrinin keçmiş komandanı, bu yaxınlarda sürgündən qayıtmış Samvel Babayan Ermənistan hakimiyyətini və hərbiçilərini kəskin tənqidə məruz qoyub, Azərbaycanın apreldə ələ keçirdiyi ərazilərin strateji əhəmiyyət kəsb etdiyini bildirib. Belə ki, CivilNet-ə müsahibəsində o qeyd edib ki, dörd günlük müharibə zamanı Azərbaycanın uğurları, Azərbaycanlıların yarım və ya bir saat ərzində bu mövqeləri ələ keçirməsi Bakının özü üçün gözlənilməz idi.

“Azərbaycanlıların iki korpusunun ehtiyat briqadaları erməni mövqelərini ələ keçiriblər, bundan sonra bizimkilər əks hücuma keçməyə, itirilmiş mövqeləri qaytarmağa çalışıblar, haradasa bu, alınıb, amma haralarda isə biz uğursuz olmuşuq. Buna bizim biganəliyimiz səbəb olub və mövqelərimiz zəifləyib. MN araşdırma aparmalı və həqiqətdə nə baş verdiyini anlamalıdır. Faktdır ki, bir saat ərzində bu mövqelər əldən verilib”, deyə Babayan bildirib.

“Bilmirəm bu əraziləri kim 800 və ya 1800 metr olaraq ölçüb. Konkret olaraq Mardakert istiqamətində bu mövqelərə gəlincə, bu, ikili təyinatı olan strateji məntəqələr idi, birincisi, onlar əhalinin yaşamaq imkanını təmin edirdi. İkincisi, bu ərazidən bütün düzənlik – Kirovabaddan Mirbaşirə qədər - bizim ovucumuzun içində idi... Strateji olmayan mövqe yoxdur, xüsusən də Mardakert istiqamətində”, deyə o bildirib.

Azərbaycanın müharibəyə hazırlaşdığını və “ön cəbhəni, habelə şəhərləri və kəndləri yerlə yeksan etmək məqsədilə” çox sayda artilleriya və raket aldığını qeyd edən Babayan əlavə edib ki, Ermənistan Azərbaycanla nə maddi, nə də insan resursları cəhətdən rəqabət apara bilməz.

Onun sözlərinə görə, 2014-cü ildən etibarən Azərbaycan uzunmüddətli müharibəyə hazırlaşır və artilleriyaya xüsusi diqqət yetirəcək, erməni mövqelərini uzaqdan zərərsizləşdirməyə çalışacaq. Onun silahla bağlı problemi olmayacaq, belə ki, Bakı artıq mərmi istehsalına başlayır. “Bizim piyadalar düşməni ən az 300-500 metr məsafədə saxlamalıdır. Buna müvəffəq olmasaq, biz düşmənə arxa cəbhəyə sızmaq imkanı verəcəyik, bunun doğru olduğunu düşünmürəm. Azərbaycan müasir silah alır, onun məqsədi ön cəbhəni yerlə-yeksan etməkdir, bu, aydındır. Biz Azərbaycanın resursları ilə rəqabət aparmaq iqtidarında deyilik və buna görə həll yolu tapmalıyıq”, deyə Babayan bildirib.

“Təsəvvür edin ki, onlar Naxçıvanda müxtəlif İsrail, Rusiya reaktiv sistemləri quraşdırır. Belə bir sual yaranır: niyə? Qarabağa zərbə endirmək üçün? Bunun üçün onlar reaktiv sistemləri Naxçıvanda deyil, Qarabağla sərhəddə yerləşdirə bilərdi. Yəni biz deyəndə ki, hücuma başlamağa hazırıq, düşmən mütləq bundan istifadə edəcək və Yerevana zərbə endirəcək. Yerevandan Naxçıvana qədər məsafə 42 kilometrdir. Bu silah, bu rekativ raket sistemləri 70-150 km məsafədə işləyir... Biz onlardan qorunmaq, şəhərlərimizi və kəndlərimizi qorumaq iqtidarındayıq? Axı iş Bakıda çay içəcəyimizi deməkdə deyil. Bakıda çay içə bilərsiniz, amma qorxuram ki, onlar Yerevana daha tez çatacaqlar və burada çay içəcəklər. General forması geyinib kolxoz sədri kimi bəyanatlar vermək olmaz. Bizim əsgərimiz bu qədər raketə qarşı müqavimət göstərə bilməyəcək... bir dəqiqə ərzində ön cəbhəyə 25 minə yaxın mərmi düşsə, orada insan tab gətirə bilər? Bizim əhval-ruhiyyəmizin yüksək olması nə deməkdir? Əhval-ruhiyyəniz raketi tutacaq, yoxsa əsgərlər havada mərmi yaxalayacaq? Biz əsgərlərimizin təhlükəsizliyi barədə düşünmək məcburiyyətindəyik”, deyə Babayan bildirib.

Daha sonra Babayan guya azərbaycanlıların qarşısını ala biləcək hansısa ideyalar və RƏM sistemi silahları haqqında danışıb. Amma onun bu bəyanatı elə özünün yuxarıda dediklərinə ziddir. “Qarşımızda hava məkanını bağlamaq vəzifəsi durur”, deyən Babayan əlavə edib ki, öz fikirlərini rəhbərliyə bildirib. Konkret silah adı çəkməyən Babayan, bununla belə, bu silahı Ermənistana KTMT üzrə tərəfdaş kimi Rusiyanın, həm də aşağı qiymətlə verməli olduğunu açıqlayır. Samvel Babayanın fikrincə, hazırda Qarabağ deyil, bütün Erməni dövlətçiliyi məsələsi gündəmdədir. “Amma hərbi rəhbərlik raketlərin gücünü və ya imkanlarını belə anlamadan, iki raketlə Bakını yerlə bir edəcəyimizlə öz xalqını aldatmamalıdır. Öz xalqını aldatmaq olmaz”, deyə o bildirib. -02D-

Rəy yaz

Dünyada

İran Prezidentinin həlak olduğu hadisə Azərbaycan- İran münasibətlərinə təsir edə bilərmi? – Nəsimi Məmmədli Çətin sualda



Bizi sosial şəbəkələrdə izləyin

Xəbər lenti