Məhkəmə icmalı: 18–19 iyun 2026-cı il

Siyasətçilər, vətəndaş cəmiyyəti nümayəndələri və jurnalistlərin məhkəmə prosesləri

1. İyunun 18-də Bakı Ağır Cinayətlər Məhkəməsində “QHT işi” üzrə həbs olunan Vətəndaş Hüquqları İnstitutunun rəhbəri Bəşir Süleymanlının işi üzrə məhkəmənin növbəti iclası keçirilib.

Hakim Vüqar Seyidovun sədrliyi ilə keçirilən iclasda məhkəmə müdafiə tərəfinə dindirilməmiş şahidlərin ifadələrinin elan edilməsini təklif edib.

B. Süleymanlı bununla razılaşıb, lakin əlavə şahid qismində ABŞ-nin “German Marşal Fondu”nun (GMF) Azərbaycan üzrə keçmiş məsləhətçisi Mehriban Rəhimlinin dindirilməsi barədə vəsatət verib.

Məhkəmə vəsatəti təmin edərək qərara alıb ki, şahidlərin ifadələri elan olunmuş hesab edilsin və əlavə şahid kimi M. Rəhimli dindirilsin.

Məhkəmənin növbəti iclası iyulun 9-da keçiriləcək.

2. İyunun 18-də Bakı Apellyasiya Məhkəməsində azel.tv saytının rəhbəri Əfqan Sadıqov barəsində həbs qətimkan tədbirinin seçilməsi ilə bağlı Binəqədi Rayon Məhkəməsinin qərarından verilmiş şikayətə baxılıb.

Məhkəmə şikayəti təmin etməyib və rayon məhkəməsinin qərarını qüvvədə saxlayıb.

Ə. Sadıqov iyunun 9-da həbs olunub. O, hədə-qorxu ilə tələb etmədə ittiham olunur.

Bu ittiham üzrə cinayət işi 2024-cü ildə başlasa da, bu ilin aprelində ona xitam verilib.

Sadıqov aprel ayında Gürcüstandan Azərbaycana deportasiya edilib.

Daha sonra Baş Prokurorluq cinayət işinə xitam verilməsi ilə bağlı qərarı ləğv edib və Ə. Sadıqova qarşı yenidən ittiham irəli sürülüb.

3. İyunun 18-də Bakı Ağır Cinayətlər Məhkəməsində hakim Mahirə Kərimovanın sədrliyi ilə keçmiş vəkil Namizəd Səfərovun işi üzrə hazırlıq məhkəmə iclası keçirilib.

İclasda hüquqşünas ona verilmiş dələduzluq ittihamının tamamilə qondarma olduğunu bildirib.

O vurğulayıb ki, işə düzəltmək adı ilə 53 min manat pulunu mənimsədiyi iddia edilən qadını nə tanıyıb, nə də ondan pul alıb.

Onun sözlərinə görə, ortada sübut olaraq nə bir telefon zəngi, nə də yazışma var.

O, siyasi fəaliyyətinə və tənqidi çıxışlarına görə cəzalandırıldığını xüsusi vurğulayıb.

İclasda müdafiə tərəfi Səfərov barəsindəki cinayət işinə xitam verilməsi barədə vəsatət qaldırıb.

Müdafiəçilər diqqət çəkiblər ki, N. Səfərov barədə Daxili İşlər Nazirliyinin “102” xidmətinə şikayət onun saxlanılmasından bir neçə saat sonra daxil olub.

Müdafiə tərəfi bu faktın özünün Səfərovun həbsinin qabaqcadan planlaşdırıldığını təsdiqlədiyini bildirib.

Daha sonra vəkillər N. Səfərovun ev dustaqlığına buraxılması ilə bağlı vəsatət veriblər.

Məhkəmə bu vəsatətlərin heç birini təmin etməyib.

Növbəti iclas iyulun 2-nə təyin olunub.

Korrupsiya və dövlət orqanları ilə bağlı məhkəmə prosesləri

1. İyunun 18-də Ali Məhkəmədə hakim İlqar Qılıcovun sədrliyi ilə Bakıda “Bravo” hipermarketinə silahlı basqın etməkdə təqsirləndirilən Dəyanət Qüdrətov və Azər Məmmədov barəsində hökmdən verilmiş kassasiya şikayəti üzrə məhkəmə prosesi keçirilib.

İclasda Azər Məmmədovun kassasiya şikayətini geri götürdüyü məlum olub.

Məhkəmənin qərarına əsasən, Dəyanət Qüdrətovun şikayəti təmin olunmayıb və aşağı instansiya məhkəməsinin qərarı qüvvədə saxlanılıb.

Bakı Ağır Cinayətlər Məhkəməsinin hökmü ilə Dəyanət Qüdrətov ömürlük, Azər Məmmədov və İbrahim İbrahimov 19 il, Səbuhi Qurbanov 18 il 6 ay, Rövşən İsmayılov 4 il 11 ay 28 gün, Babək İsgəndərov isə 3 il 5 ay 28 gün müddətinə azadlıqdan məhrum ediliblər.

Bakı Apellyasiya Məhkəməsi hökmü dəyişdirmədən saxlanılması barədə qərar qəbul edib.

Xarici vətəndaşların məhkəmə prosesləri

1. İyunun 19-da Bakı Ağır Cinayətlər Məhkəməsində hakim Firdovsi Əliyevin sədrliyi ilə Azərbaycanda həbs olunan Rusiya vətəndaşlarına hökm oxunub.

İclasda son sözlə çıxış edən təqsirləndirilənlər özlərini günahkar bilməyiblər və məhkəmədən bəraət hökmü çıxarılmasını xahiş ediblər.

Məhkəmənin qərarı ilə Sergey Sofronov, Anton Draçev, Dmitri Bezuqli, Valeri Dulov 4 il, Dmitri Fedorov, Boris Timoşov, Aleksey Vasilçenko və İlya Bezuqli isə 3 il müddətinə azadlıqdan məhrum ediliblər.

Onlara ilkin olaraq Cinayət Məcəlləsinin 234.4.1-ci (narkotik satışı qabaqcadan əlbir olan bir qrup şəxs və ya mütəşəkkil dəstə tərəfindən törədildikdə) və 234.4.3-cü (külli miqdarda törədildikdə) maddələri ilə ittiham irəli sürülsə də, məhkəmə öz qərarında təqsirləndirilən şəxsləri 234.1-1-ci maddə ilə mühakimə edib.

Sergey Sofronov, Anton Draçev, Dmitri Bezuqli, Valeri Dulov, Dmitri Fedorov, Boris Timoşov, Aleksey Vasilçenko və İlya Bezuqli ötən ilin iyulun 1-də həbs olunublar.

2. İyunun 18-də Bakı Ağır Cinayətlər Məhkəməsində hakim Fərid Namazovun sədrliyi ilə Rusiya vətəndaşı Kamal İsayevin cinayət işi üzrə məhkəmə iclası keçirilib.

İclasda dövlət ittihamçısı ittiham aktını oxumağa davam edib.

O, K. İsayevin müxtəlif illərdə sosial şəbəkələrdə yazdığı paylaşımlara istinad edib.

İstinad edilən paylaşımlardan birində fəal yazıb ki, Azərbaycanda “bir gün talışlar hakimiyyətə gələcək və haqsızlığa son qoyacaq”.

Prokuror həm də iddia edib ki, K. İsayev özünü “Talış-Muğan Respublikası”nın mədəniyyət naziri adlandırıb.

K. İsayev isə bildirib ki, heç bir talış dövlətinin yaradılmasının tərəfdarı olmayıb və özünü nazir elan etməsi ilə bağlı iddia yalandır.

Onun sözlərinə görə, WhatsApp qrupunda ona mədəniyyət işləri üzrə nəzarətçilik həvalə olunub.

İsayev özünü təqsirli bilmədiyini əlavə edib.

Növbəti məhkəmə prosesi iyulun 29-na təyin olunub.

Rusiyada yaşayan Kamal İsayev ötən ilin noyabrında Türkiyəyə səfər edərkən saxlanılıb və Azərbaycana ekstradisiya edilib.

K. İsayevin “YouTube” platformasında “Jahid Kamal” və “Arya Toloş” adlı kanalları olub.

K. İsayev Cinayət Məcəlləsinin 281.2-ci (dövlət əleyhinə yönələn açıq çağırışların bir qrup şəxs tərəfindən törədilməsi), 281-1.2-ci (Azərbaycan Respublikasının ərazi bütövlüyünün parçalanmasına yönələn atribut və simvolların bir qrup şəxs tərəfindən yayılması) və 283.2.1-ci (milli, irqi, sosial və ya dini nifrət və düşmənçiliyin zor tətbiqi və ya zor hədəsi ilə salınması) maddələri ilə ittiham olunur.