Məhkəmə icmalı:15–17 iyun 2026-cı il

Siyasətçilər, vətəndaş cəmiyyəti nümayəndələri və jurnalistlərin məhkəmə prosesləri

1. İyunun 16-da Bakı Apellyasiya Məhkəməsində AXCP sədri Əli Kərimli barəsində seçilmiş həbs qətimkan tədbirinin müddətinin uzadılması ilə bağlı qərardan verilən apellyasiya şikayəti üzrə məhkəmə prosesi keçirilib.

Məhkəmə apellyasiya şikayətini təmin etməyib.

İyunun 10-da Səbail Rayon Məhkəməsi istintaq orqanının vəsatətini təmin edərək Ə.Kərimli barəsində seçilmiş həbs qətimkan tədbirini 5 ay müddətinə uzadıb.

Ə.Kərimli ötən ilin noyabrın 29-da Dövlət Təhlükəsizliyi Xidməti tərəfindən həbs olunub.

Saxlanılma Prezident Administrasiyasının sabiq rəhbəri Ramiz Mehdiyevin həbsindən sonra açılmış cinayət işi ilə əlaqələndirilib.

Əli Kərimliyə qarşı Cinayət Məcəlləsinin 278.1-ci (hakimiyyəti zorla ələ keçirməyə, dövlətin konstitusiya quruluşunu zorla dəyişdirməyə yönələn hərəkətlər) maddəsi ilə ittiham irəli sürülüb.

2. İyunun 17-də Gəncə Ağır Cinayətlər Məhkəməsində “QHT işi” çərçivəsində həbs olunan Gəncə Regional İcma Mərkəzinin rəhbəri Asəf Əhmədovun yekun məhkəmə iclası keçirilib.

İclasda çıxış edən dövlət ittihamçısı A.Əhmədov barəsində 10 il müddətinə həbs cəzası təyin etməyi məhkəmədən xahiş edib.

A.Əhmədov son sözündə barəsindəki ittihamları rədd edib və ortada hər hansı cinayətin olmadığını bildirib.

O qeyd edib ki, məqsəd vətəndaş cəmiyyəti üçün nəsə etmək istəyən bir insanı susdurmaqdır.

Məhkəmə hökmünə görə, Asəf Əhmədov 8 il müddətinə həbs olunub.

A.Əhmədov ötən ilin aprelində həbs olunub. Ona qarşı Cinayət Məcəlləsinin 193-1.3.2-ci (cinayət yolu ilə əldə edilmiş xeyli miqdarda əmlakı leqallaşdırma), 308.2-ci (ağır nəticələrə səbəb olmaqla vəzifə səlahiyyətlərindən sui-istifadə etmə) və 313-cü (vəzifə saxtakarlığı) maddələri ilə ittiham irəli sürülüb.

3. İyunun 17-də Azərbaycan Xalq Cəbhəsi Partiyasının (AXCP) üzvü Anar Ərkivan 30 sutka müddətinə həbs olunub.

Anar Ərkivan İXM-in 535.1-ci maddəsi ilə inzibati qaydada həbs olunub.

A.Ərkivan şəxsi avtomobilini idarə edən zaman yol polisi əməkdaşı onu saxlayaraq telefonla danışdığını əsas gətirərək cərimə yazmaq istəyib. O isə telefonla danışmadığını bildirib.

Daha sonra fəalı Nərimanov RPİ-nin 17-ci şöbəsinə aparıblar. Bir sutka şöbədə saxlanıldıqdan sonra Nərimanov Rayon Məhkəməsinin qərarı ilə o, 30 sutka inzibati qaydada həbs olunub.

4. İyunun 17-də Xəzər Rayon Məhkəməsində hakim Elbəy Allahverdiyevin sədrliyi ilə altı inanclı qadının cinayət işi üzrə məhkəmənin hazırlıq iclası keçirilib.

İclasda təqsirləndirilən şəxslər cinayət işi materialları və ittiham aktı ilə tanış olmadıqlarını bildiriblər.

Bu səbəbdən məhkəmə iyulun 1-nə təxirə salınıb.

Nigar Bağırova, Xoşqədəm Quliyeva, Şərqiyyə Sadıqova, Arzu Hüseynova, Aytən İbrahimova və Şəhla Fərəcova 2025-ci il avqustun 15-də Binə qəsəbəsində İmam Hüseynin 40 mərasimi günündə ehsan payladıqları üçün saxlanılıblar.

İnanclı fəallar barəsində Cinayət Məcəlləsinin 221.3-cü (xuliqanlıq) və 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) maddələri ilə cinayət işi başlanıb.

Korrupsiya və dövlət orqanları ilə bağlı məhkəmə prosesləri

1. İyunun 16-da Bakı Ağır Cinayətlər Məhkəməsinin hakimi Fəxri Məmmədovun sədrliyi ilə yarım milyondan çox dələduzluqda ittiham olunan polkovnik Rasim İldırımzadə, Dünya Azərbaycanlıları İctimai Maarif Mərkəzinin rəhbəri, “Bakutime.az” saytının təsisçisi Zaur Mirzəzadə və Balakən dairə seçki komissiyasının sabiq sədri Qoşqar Məmmədovun cinayət işi üzrə məhkəmə istintaqı yekunlaşıb.

İclasda dövlət ittihamçısı Rasim İldırımzadənin, Zaur Mirzəzadənin və Qoşqar Məmmədovun ayrı-ayrılıqda 12 il müddətinə həbs olunmasını, barələrindəki qətimkan tədbirinin həbs qətimkan tədbiri ilə əvəz edilərək məhkəmə zalında həbs olunmalarını məhkəmədən istəyib.

Vəkil müdafiə çıxışı etdikdən sonra təqsirləndirilən şəxslər son söz deyiblər.

Daha sonra hökm oxunub.

Hökmə əsasən, Rasim İldırımzadə 9 il 9 ay 14 gün, Zaur Mirzəzadə 10 il 3 ay 13 gün, Qoşqar Məmmədov isə 9 il 9 ay 16 gün azadlıqdan məhrum edilib.

Onların üçü də məhkəmə zalında dərhal həbs ediliblər.

Rasim İldırımzadə, Zaur Mirzəzadə və Qoşqar Məmmədov əlbir olaraq xüsusilə külli miqdarda dələduzluq etməkdə təqsirləndirilirlər. Onlar barəsində Cinayət Məcəlləsinin 178.4-cü (dələduzluq, xüsusilə külli miqdarda törədildikdə) maddəsi ilə ittiham irəli sürülüb.

2. İyunun 17-də Bakı Ağır Cinayətlər Məhkəməsində hakim Vüqar Quliyevin sədrliyi ilə Bakıda “İdrak” liseyində müəllimini güllələməkdə təqsirləndirilən yeniyetmənin cinayət işi üzrə məhkəmənin hazırlıq iclası keçirilib.

İclasda anket məlumatları dəqiqləşdirilib.

Təqsirləndirilən şəxsin vəkili Rəşad Mirmehdizadə vəsatət verərək müdafiə etdiyi şəxsin yetkinlik yaşına çatmadığını bildirib və proseslərin qapalı keçirilməsini xahiş edib.

Bundan başqa, o, həbs qətimkan tədbirinin ev dustaqlığı qətimkan tədbiri ilə əvəzlənməsini də məhkəmədən xahiş edib.

Vəkil bildirib ki, təqsirləndirilən şəxs əməli törədərkən nə etdiyinin fərqində olmayıb və bu əməli internetin, oyunların təsiri ilə törədib.

Vəkil zərərçəkənlə barışıq əldə olunduğunu da bildirib. Saxlanıldığı müddətdə yeniyetmənin özünü yaxşı aparması ilə bağlı arayış, şagirdin diplomları da məhkəməyə təqdim edilib.

Dövlət ittihamçısı qətimkan tədbirinin dəyişdirilmədən saxlanılmasını təklif edib. İşin qapalı keçirilməsi ilə bağlı vəsatəti isə məhkəmənin mülahizəsinə buraxıb.

Müşavirədən sonra qərar elan olunub.

Qərara əsasən, cinayət işi məhkəmə baxışına verilib və baxış iclası iyulun 1-nə təyin edilib. Təqsirləndirilən şəxs barəsində seçilmiş həbs qətimkan tədbiri qüvvədə saxlanılıb.

Prosesin qapalı keçirilməsi ilə bağlı vəsatət də təmin edilməyib.

Hadisə fevralın 6-da paytaxtın Binəqədi rayonunda yerləşən özəl “İdrak” liseyində baş verib.

Faktla bağlı Binəqədi rayon prokurorluğunda cinayət işi başlanılıb. Ə.Ş-yə Azərbaycan Respublikasının Cinayət Məcəlləsinin 29, 120.2.2-ci (xuliqanlıq niyyəti ilə adam öldürməyə cəhd) maddəsi ilə yekun ittiham elan olunub.

3. İyunun 17-də Bakı Ağır Cinayətlər Məhkəməsində hakim Babək Pənahovun sədrliyi ilə Yasamal rayonunda çoxmərtəbəli yaşayış binasında baş vermiş və 3 nəfərin ölümü ilə nəticələnmiş yanğın hadisəsi ilə bağlı cinayət işi üzrə məhkəmə prosesi başlayıb.

İclasda təqsirləndirilən şəxs, “Loft Dent” klinikasının direktoru Bəhruz Paşayevin və zərərçəkmişlərin anket məlumatları dəqiqləşdirilib.

Dövlət ittihamçısı təqsirləndirilən şəxs barəsində seçilmiş həbs qətimkan tədbirinin qüvvədə saxlanılmasını və işin məhkəmə baxışına verilməsini təklif edib.

Müdafiə tərəfi isə işin ibtidai istintaqa qaytarılması barədə vəsatət qaldıraraq hadisə ilə bağlı digər şəxsin də təqsirləndirilən qismində cəlb olunmalı olduğunu bildirib.

Zərərçəkmiş tərəf də analoji tələblə çıxış edib.

Məhkəmə vəsatətləri təmin etməyib, işin məhkəmə baxışına verilməsi və Bəhruz Paşayev barəsində seçilmiş həbs qətimkan tədbirinin dəyişdirilmədən saxlanılması barədə qərar qəbul edib.

Növbəti məhkəmə iclası iyulun 30-na təyin olunub.

Hadisə nəticəsində 2018-ci il təvəllüdlü Arzu Qəmbərli, Bakı Milli Geyim Evinin rəhbəri Könül Hümbətova və Samir Məmmədov tüstüdən zəhərlənərək həyatlarını itiriblər. Bundan başqa, 26 nəfər tüstüdən zəhərlənib.

Hadisənin baş verdiyi binadakı qeyri-yaşayış obyektini icarəyə götürmüş “TAXES GROUP” MMC-nin qanuni təmsilçisi və “Loft Dent” klinikasının direktoru Bəhruz Paşayev saxlanılıb və ona Cinayət Məcəlləsinin müvafiq maddələri ilə ittiham irəli sürülərək barəsində həbs qətimkan tədbiri seçilib.

Separatçıların məhkəmə prosesləri

1. İyunun 16-da Bakı Apellyasiya Məhkəməsində hakim Elmar Rəhimovun sədrliyi, Emin Mehdiyev və Mehriban Qarayevanın iştirakı ilə Ermənistan Respublikası vətəndaşları Arayik Harutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digərlərinin apellyasiya şikayətləri üzrə məhkəmə baxışı davam etdirilib.

İclasda sədrlik edən hakim müdafiə tərəfinin çıxışlara hazır olub-olmadığını soruşub. Müdafiə tərəfi çıxışlara hazır olduğunu bildirib.

Təqsirləndirilən Davit İşxanyan söz alaraq müdafiəçisi ilə konfidensial qaydada görüşmək istədiyini bildirib. Onun vəsatəti təmin edilib.

Sonra müdafiə çıxışı üçün söz təqsirləndirilən Levon Mnatsakanyanın vəkilinə verilib.

Vəkil çıxışında L.Mnatsakanyan barəsində bəraətverici əsaslarla qərar çıxarılmasını məhkəmədən xahiş edib.

Ardınca L.Mnatsakanyan çıxış edib. Təqsirləndirilən şəxs vəkilinin söylədiklərini müdafiə etdiyini bildirərək öz arqumentlərini səsləndirib.

Məhkəmənin növbəti iclası iyunun 23-də keçiriləcək.

Bakı Hərbi Məhkəməsinin 5 fevral 2026-cı il tarixli hökmünə əsasən, Arayik Harutyunyan, Levon Mnatsakanyan, David Manukyan, Davit İşxanyan və David Babayan ömürlük azadlıqdan məhrumetmə cəzasına məhkum ediliblər.

Arkadi Qukasyan və Bako Sahakyan 20 il, Madat Babayan və Melikset Paşayan 19 il, Qarik Martirosyan 18 il, Davit Allahverdiyan və Levon Balayan 16 il, Vasili Beqlaryan, Qurgen Stepanyan və Erik Qazaryan isə 15 il müddətinə azadlıqdan məhrum ediliblər.

Onlar Ermənistanın Azərbaycana qarşı hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, terrorçuluq, terrorçuluğun maliyyələşdirilməsi, hakimiyyəti zorla ələ keçirmə və digər çoxsaylı cinayətlərdə ittiham olunurlar.