ADY-də prezidentin tənqidi fikirləri müzakirə edilib

Bakı/11.08.20/Turan: “Azərbaycan Dəmir Yolları” QSC-də dövlət başçısının çıxışında göstərilən məsələlərə dair videokonfrans formatında geniş tərkibli iclas keçirilib.

İclasda Azərbaycan Prezidenti İlham Əliyevin 6 avqust 2020-ci il tarixində koronavirusla mübarizə sahəsində görülən tədbirlər və sosial-iqtisadi vəziyyətlə bağlı keçirdiyi müşavirədə “Azərbaycan Dəmir Yolları” QSC-nin fəaliyyəti barədə səsləndirdiyi fikirlərdən irəli gələn məsələlər müzakirə olunub, bu barədə ADY-nın mətbuat xidməti məlumat verir.

“Azərbaycan Dəmir Yolları” QSC-nin sədri Cavid Qurbanov dövlət başçısının çıxışında səmərəliliklə bağlı qeyd edilən haqlı iradları iclasda səsləndirərək, bu istiqamətdə Cəmiyyətin fəaliyyətinin təkmilləşdirilməsinin, idarəetmə sistemində münasibətlərə yeni müstəvidə baxılması məqsədilə işlərin sürətləndirilməsinin vacibliyini vurğulayıb.

“Asiya İnkişaf Bankı” ilə instusional islahatlar sahəsində aparılmış əməkdaşlıq çərçivəsində fəaliyyətə əsaslanan korporativ və insan resursları idarəedilməsinin təkmilləşdirilməsi, rəqəmsal transformasiya istiqamətində layihələr, maliyyə sisteminin müasir tələblərə uyğun qurulması, borcların restrukturizasiyası və digər məsələlərlə bağlı bir sıra işlər yerinə yetirilib.

İclasın yekunun dövlət başçısının tapşırığı istiqamətində işləri sürətləndirmək, o cümlədən səmərəliliyin artırılması və xərclərin optimallaşdırılması məqsədilə təhlillərin aparılması ilə bağlı zəruri addımların atılması qərara alınıb.

ADY-nın 2018-ci il üçün maliyyə hesabatına əsasən, 2019-cu ilin əvvəlinə olan kredit öhdəlikləri 2 milyard 724.1 milyon manat təşkil edib. 2018-ci ildə şirkətin zərərləri 371 milyon manat təşkil edib və 1 milyard 475.8 milyon manata çatıb.

Xatırladaq ki, avqustun 6-da dövlət başçısı dövlət şirkətlərini tənqid edərək, onların bir çoxunun zərərlə işlədiyini və borc öhdəliklərinin dövlət büdcəsi hesabına ödənildiyini vurğulayıb:

“Yeni xətlər çəkilir, yeni vaqonlar, yeni lokomotivlər alınır, yüz milyonlarla manat vəsait ayrılır. Bunun faydası hanı? Axı bunlar mənfəətlə işləməlidirlər", - deyə İlham Əliyev bildirib. 08D--